COTOBADE (PONTEVEDRA), 27 Ago. (EUROPA PRESS) -
O presidente da Xunta e candidato á reelección polo PPdeG, Alberto Núñez Feijóo, insistiu este sábado en que non quere para Galicia "leas nin partidos liados", senón manter "a excepción da estabilidade" para que a comunidade poida avanzar.
No acto de inicio do curso político, que este ano se celebrou na Carballeira de San Xusto en Cotobade (pola negativa da Deputación de Pontevedra a ceder o Castelo de Soutomaior) e no que volveu estar acompañado por Mariano Rajoy, o presidente dos populares galegos asegurou que non quere en Galicia "nin divisións, nin bloqueo nin vetos nin parálise". "Tampouco o quero para o resto de España (*), queremos un país normal, no que as eleccións sexan as que deciden os gobernos,", engadiu.
Feijóo comparou a situación de estabilidade da comunidade galega nos últimos meses co bloqueo político a nivel nacional, e constatou que "España debería parecerse máis a Galicia". "A estabilidade é un factor determinante, e é un orgullo mantela en Galicia dende o primeiro instante", apostilou.
O candidato do PPdeG fixo balance da súa xestión, e reiterou que a economía de Galicia crece, hai menos parados e os servizos públicos "están garantidos financeiramente". "Queda moito por facer, pero o que ninguén nos pode quitar é que hoxe hai máis esperanza no futuro (*). Deixamos Galicia mellor do que nola atopamos, e iso non nolo poden quitar", proclamou.
De novo comparando a situación galega coa nacional, Feijóo insistiu en que, mentres a oposición "bloqueou o resultado electoral" en España, a Xunta de Galicia aprobou os presupostos, baixou uns impostos e eliminou outros, reduciu o paro, aprobou a lei da Área Metropolitana de Vigo, inverteu o superávit, impulsou sectores como o naval ou a automoción, e cumpriu as súas obrigas contables, entre outros logros.
