SANTIAGO DE COMPOSTELA, 24 Ago. (EUROPA PRESS) -
Un total de once persoas resultaron feridas de diversa consideración en catro accidentes que se rexistraron durante a tarde deste sábado en diferentes puntos de Galicia.
Nun dos incidentes tiveron que intervir os bombeiros para sacar a unha persona que se atopaba atrapada no interior do coche que se empotrou contra un muro en Miño (A Coruña). En concreto, o 112 Galicia informou este sábado de que o sinistro tivo lugar na N-651, ao seu paso pola parroquia de Leiro, lugar ao que se desprazaron os Bombeiros de Betanzos tras recibir o aviso sobre un accidente que deixou a dúas persoas feridas.
O choque deste vehículo ocorreu pouco antes de 17,00 horas e, ademais dos efectivos do parque comarcal, tamén acudiron sanitarios do 061 para atender aos feridos cando os bombeiros lograron extraer a porta do coche que estaba bloqueada.
Así, unha ambulancia trasladou aos dous ocupantes ao centro hospitalario de referencia, mentres, aínda no lugar do sinistro, o persoal de limpeza e mantemento do Ministerio de Fomento encargábase da retirada dos danos provocados e restablecía as condicións de seguridade na vía, explicou o 112 Galicia.
SETE FERIDOS EN VIGO
Na cidade de Vigo, sete persoas foron atendidas despois de que un autobús urbano sufrise un accidente na Gran Vía.
Segundo a información facilitada ao 112 Galicia, os feridos presentaban lesións de diversa consideración, aínda que maioritariamente, eran leves. Todos foron conducidos a diferentes centros hospitalarios para someterse ás correspondentes revisións médicas.
OUTROS ACCIDENTES
Na localidade coruñesa de Perbes unha persoa resultou ferida tras unha colisión entre dous vehículos antes das 17,00 horas da tarde, na DP-4803. Até o lugar trasladáronse os servizos sanitarios de urxencia e os axentes da Policía Local, xunto cos voluntarios de Protección Civil.
Por outra banda, o 112 Galicia recibiu pouco antes do mediodía un aviso por mor dun choque entre un turismo e unha moto na Avenida da Coruña, en Lugo. A consecuencia do impacto, o motorista resultou ferido e necesitou asistencia por parte dun equipo de Urxencias Sanitarias de Galicia-061.
Unha chamada particular foi a que alertou aos servizos de emerxencias de que un motorista "necesitaba axuda urxente". A maiores dos profesionais sanitarios, dende o 112 Galicia informouse ós axentes da Policía Local e avisouse aos bombeiros da cidade. No entanto, o ferido estaba liberado e accesible.
