SANTIAGO DE COMPOSTELA, 15 Abr. (EUROPA PRESS) -
O delegado territorial da Xunta na Coruña, Ovidio Rodeiro, visitou este luns, acompañado polo alcalde do municipio coruñés de Dodro, Valentín Alfonsín, unha das zonas na que traballarán o catro desempregados contratados a través das axudas de 'Aprol Rural', un programa que acaba de resolver a Consellería de Economía, Emprego e Industria, para que os concellos poidan contratar persoal para labores de limpeza e prevención de incendios.
Nesta comarca, segundo datos da Xunta, aprobouse a contratación de 38 desempregados grazas a un investimento de 506.000 euros. Na provincia da Coruña contrataranse 133 persoas, con case 1,7 millóns de euros.
O orzamento desta iniciativa aumentou un 13% con respecto ao 2018, e os 'Concellos Emprendedores', que tiveron prioridade á hora de acceder a estes apoios, lograron o dobre de contratos que os municipios que non contan con este distintivo autonómico que busca favorecer a actividade industrial na Comunidade.
A Consellería de Economía financiará o 100% dos contratos que realicen as entidades locais do rural galego, que terán que estar vinculados á realización de tarefas relacionadas coa xestión do monte e a prevención de incendios.
LIMPEZA DE MONTES
Así, os desempregados poderán contratase para o desenvolvemento de actividades de silvicultura, limpeza de montes, xestión de biomasa, valorización forestal ou planificación preventiva.
"O obxectivo é proporcionar ás persoas sen traballo que habitan nos concellos rurais de Galicia (aqueles que non contan con ningunha zona densamente poboada a nivel parroquial) unha experiencia práctica e profesional necesarias para facilitar a súa inserción no mercado de traballo", destacou a Xunta.
Este ano a administración autonómica eliminou os límites de contratación por concello e incentivou con máis contratos ás localidades fusionadas e ás adheridas ao protocolo de 'Concellos Emprendedores'.
Así mesmo, tiveron prioridade os municipios con maior superficie forestal e aumentouse a contía media por traballador, que este ano se sitúa nos 13.176 euros, case un 20% máis que no exercicio anterior.