Juárez non descarta novos arrestos tras a detención de dous presuntos membros de Resistencia Galega

VIGO, 30 Oct. (EUROPA PRESS) -

O delegado do Goberno en Galicia, Samuel Juárez, afirmou que non se poden descartar novas detencións tras o arresto de dous presuntos membros de Resistencia Galega practicados na noite do luns en Ferrol e os rexistros realizados. Nese sentido, explicou que este tipo de actuacións se fan, entre outras cousas, para conseguir máis información que "pode levar a máis detencións", se ben precisou que neste momento non hai información "nun sentido ou noutro".

En declaracións aos medios en Vigo, Juárez recordou que sobre as 23.00 horas do luns foron arrestados en Ferrol un home e unha muller, supostamente vinculados aos "sistemas financeiros" de Resistencia Galega. Ambos os dous pasarán probablemente a disposición da Audiencia Nacional ao longo deste martes.

Así mesmo, indicou que ao longo de toda a noite se realizaron rexistros na área de Ferrol, dos cales sairá documentación e material para "tratar de seguir co obxectivo de desarticular e reducir a capacidade operativa desta organización terrorista". De igual modo, explicou que a partir da análise da documentación localizada se terá máis información sobre o "funcionamento e o financiamento" de Resistencia Galega.

DETENCIÓNS

Segundo manifestou Samuel Juárez, as detencións de Julio César Sayans Suárez e Silvia María Casal Sabín, practicadas na noite do luns, teñen que ver cos arrestos de cinco integrantes de Resistencia Galega realizados hai case un ano, o 30 de novembro de 2011. Segundo explicou, chegouse ata estas dúas persoas tras a análise da documentación incautada naquel momento.

Sobre se tiñan algún obxectivo inminente, Juárez explicou que "se cre que estas persoas estaban relacionadas directamente coa organización" e que "participaban en todo o aparato" se ben "non tanto en operativos inminentes", pois non estaban relacionadas con iso.