SANTIAGO DE COMPOSTELA, 21 Sep. (EUROPA PRESS) -
O portavoz de En Marea, Luís Villares, acusou ao PSOE e ao PP de utilizar a débeda do Estado coas comunidades autónomas como "táctica preelectoral", tralo anuncio do Goberno para o desbloqueo de 4.500 millóns para estes territorios que, "até onte, parecían imposibles", ironizou.
"Non é verosímil que durante meses a avogacía do Estado non atopase modo de transferir o diñeiro que debía ás comunidades autónomas e no día seguinte de convocarse as eleccións apareza esa fórmula", sinala, nun comunicado.
Neste sentido, arremeteu contra populares e socialistas por "facer desta disputa" unha cuestión electoral "sen contar coa cidadanía e sen contar que ese diñeiro pon en risco servizos básicos para a xente".
Villares reprochou ao partido liderado por Pedro Sánchez de "chantaxear a todas as comunidades" a través do financiamento autonómico para "conseguir apoios" de cara á investidura.
Á súa vez, considerou que Feijóo perdeu "o seu principal argumento" de cara ao debate do estado da nación previsto para esta semana. "Adiantou o debate para poder incorporarse á carreira electoral", sinalou, ironizando con que agora "xa non ten argumentos para seguir recortando servizos e continuar na precarización do emprego público".
