Pide unha mesa galega da automoción para garantir condicións laborais "xustas"
VIGO, 24 Abr. (EUROPA PRESS) -
En Marea propuxo este mércores a creación dun gran parque da automoción con carácter europeo e con sede principal na área de Vigo, dotado cun fondo público-privado (con achegas da Xunta, o Estado e a UE) de 400 millóns de euros, e que crearía 30.000 empregos nos próximos anos, ligados ao desenvolvemento da industria 4.0 e a I+D+i.
Así o trasladou o portavoz da formación, Luís Villares, após manter en Vigo un encontro con representantes de traballadores do sector, no que estivo acompañado polos candidatos Manuel González Moreira e Teresa Pérez. Segundo incidiu, "non é unha utopía" subir dos 170.000 actuais aos 200.000 empregados neste sector.
Villares explicou que a finalidade deste plan é desenvolver a I+D+i ligada á automoción "que xa é do presente", é dicir, a dos modelos híbridos, eléctricos e autónomos; así como a adaptación de procesos á robotización e á industria 4.0.
Por outra banda, En Marea apostou por "crear sinerxías" entre as factorías principais e a industria secundaria, así como "adaptar" a Formación Profesional pública "en tempo real" ás necesidades deste sector, para que a robotización de procesos non leve aos despedimentos, senón que se recicle aos traballadores e que haxa substitución xeracional.
MESA GALEGA DE AUTOMOCIÓN
Ademais, incidiu Villares, Galicia non pode "quedar atrás" en materia de innovación, e avogou por unha "estratexia" que poña a esta rexión "á vangarda" porque, nestes momentos, están a importarse materiais tecnolóxicos en lugar de crear o coñecemento e aplicalo á industria.
Finalmente, o portavoz de En Marea subliñou a necesidade de que haxa "relacións laborais xustas" no sector da automoción, e propuxo a creación dunha "mesa galega da automoción", con participación de CEAGA, sindicatos, e universidades para vixiar a aplicación de condicións laborais xustas e "deter a precarización" que lles afecta actualmente as empresas desta industria.
