SANTIAGO DE COMPOSTELA, 17 Feb. (EUROPA PRESS) -
Unha trintena de mareas muncipalistas afíns á En Marea que encabeza Luís Villares presentan este martes en Santiago un manifesto para chamar á configuración dunha candidadatura unitaria do soberanismo galego nas eleccións autonómicas do próximo 5 de abril.
"Cando se fala das mareas refírense a dúas ou tres. O municipalismo é moito máis", asegura en declaracións a Europa Press Antonio Araúxo (Manifesto Miñor), que asegura que o manifesto está apoiado por mareas municipalistas de "todas as comarcas de Galicia".
A falta de cinco días para o peche do prazo para o rexistro de coalicións para os comicios galegos e co foco situado en como concorrerá ás eleccións o espazo antes agrupado en En Marea, estes proxectos municipalistas lanzan unha chamada a "responsabilizarse" a "todas as persoas e organizacións" que apostan pola "unidade" da "esquerda soberanista" para as autonómicas.
Unha chamada dirixida a Anova, pero tamén a "todo o municipalismo" que, segundo reivindica Araúxo, non se limita ás mareas de Santiago e A Coruña, situadas coa formación fundada en 2012 por Xosé Manuel Beiras de cara a construír unha candidatura, polo momento, distinta á que promoven Podemos e Esquerda Unida, que se decantan por reeditar a coalición Galicia en Común coa que se presentaron ás xerais de 2019.
As organizacións por agora adheridas ao manifesto son Marea Pontevedra, Lugonovo, Marea de Ferrol, Manifesto Miñor, Somos Ribadumia, Movemento Oia, ACE Bueu, En Marea, A Guarda, En Marea Tui, Manifesto Miñor Nigrán, Manifesto Miñor Baiona, Manifesto Miñor Gondomar, Valga Viva, En Marea Ponteareas, Movemento Salceda, Sempre Corcubión, Somos Cabanas, Marea Veciñal de Touro, Xuntos Carballo, Marea veciñal de Culleredo, EM Mondoñedo, EM Ribadeo, Son Manzaneda, Xuntos por Chandrexa, Xuntos por Laza, Son de Trives e Ourense Mellor.
