O seu titular asegura que a Oficina Técnica da Seca non se reunirá até abril ante a previsión de que sigan as precipitacións
A CORUÑA, 12 Mar. (EUROPA PRESS) -
A conselleira de Medio Ambiente, Beatriz Mato, situou a capacidade dos encoros nun 66 por cento tras as últimas choivas rexistradas en Galicia, co paso da borrasca 'Félix', polo que asegurou que a situación dos mesmos non é neste momento "preocupante".
A preguntas dos xornalistas, coincidindo coa presentación dunha nova orde que publicará a Xunta para favorecer a eliminación de plantacións de eucaliptos, asegurou que, en concreto, os encoros de abastecemento están "case ao 80%".
Tendo en conta estes encoros e os hidroeléctricos, a capacidade de media sitúase no 66%, de acordo os datos dos que dispón a Consellería de Medio Ambiente.
REUNIÓN DA OFICINA DA SECA
Preguntada se se manterá a situación de prealerta por seca, Mato explicou que estaba previsto convocar proximamente a Oficina Técnica da Seca. No entanto, engadiu que "á vista desta borrasca e da previsión de que seguirá chovendo" non se reunirá até principios de abril.
"Para facer unha avaliación máis rigorosa", apuntou a conselleira quen, a pesar das últimas precipitacións, volveu a facer un chamamento a "un consumo responsable da auga" tanto á cidadanía en xeral como ás empresas.
Mentres, sobre o desbordamento dalgúns ríos e se está previsto adaptar algunhas medidas concretas, a conselleira asegurou que están os protocolos correspondentes "activados". "Pero non máis medidas que o control", engadiu sobre as actuacións previstas.
