O Ministerio de Sanidad convoca en Madrid este xoves aos servizos xurídicos de Sanidade para abordar o catálogo

BASTET78/WIKIMEDIA COMMONS

SANTIAGO DE COMPOSTELA 16 Mar. (EUROPA PRESS) -

O Ministerio de Sanidad convocou á Consellería de Sanidade a unha reunión este xoves día 17 en Madrid para continuar a negociación sobre a lei galega de racionalización do gasto farmacéutico, recorrida polo Goberno central ante o Tribunal Constitucional (TC), que suspendeu de xeito preventivo a aplicación do catálogo priorizado de medicamentos.

Segundo informaron a Europa Press fontes do Ministerio de Sanidad, o martes o departamento de Leire Pajín convocou por carta á Consellería de Sanidade para unha nova reunión este xoves na capital española.

Na carta remitida á titular de Sanidade, Pilar Farjas, o secretario xeral de Sanidade, José Martínez-Olmos, propón á conselleira unha nova reunión entre os equipos xurídicos ás 11.00 horas deste xoves na sede do Ministerio en Madrid.

Deste modo, esta representa a segunda cita á que o ministerio empraza á Xunta, tras a mantida en Santiago o pasado día 9 entre asesores xurídicos de Sanidade e da Consellería, que concluíu sen ningún avance nin acordo.

De feito, tras a reunión da semana pasada, a Consellería de Sanidade lamentou que o equipo de asesores xurídicos do Ministerio desprazado a Galicia acudise "sen nada novo" e non fixese "nin unha soa proposta", polo que lle transmitiron a Sanidade que a Xunta mantería a vontade de diálogo sempre que se retire o recurso" presentado ante o Tribunal Constitucional contra a lei galega pola que foi creado o catálogo galego.

Pola súa banda, o Ministerio de Sanidad condiciona a retirada do recurso presentado polo Goberno central ante o Tribunal Constitucional contra a lei galega de racionalización do gasto farmacéutico a que a Xunta presente "unha proposta concreta de modificación legal" da normativa recorrida.

RETIRADA DA SUSPENSIÓN

Sobre a retirada da petición de suspensión do catálogo de fármacos galego, que foi paralizado de xeito preventivo polo TC, o Ministerio recalcou que non podía posicionarse "ata non coñecer os cambios concretos e o procedemento para facelos operativos" que o reclamou á consellería.

Tras a publicación este luns no Boletín Oficial do Estado (BOE) da admisión a trámite do recurso presentado polo Executivo central ante esta medida, o Tribunal Constitucional deberá ratificar ou levantar a suspensión do catálogo priorizado de produtos farmacéuticos de Galicia antes do próximo 11 de xullo.