Publicado 01/08/2020 12:22:25 +02:00CET

Os casos activos soben en 28 e Galicia volve superar os 300, un terzo deles na área da Coruña

Unha sanitaria realízalle un frotis bucal a un veciño de Ordizi a 6 de xullo de 2020
Javi Colmenero - Europa Press

   A área de Lugo é a única que rexistra un descenso das cifras, mentres que Ferrol mantense igual e o resto teñen incrementos

   SANTIAGO DE COMPOSTELA, 1 Ago. (EUROPA PRESS) -

   Os casos activos incrementáronse en 28 en Galicia este sábado e a comunidade volve superar os 300, máis dun terzo dos cales corresponden á área sanitaria da Coruña, onde o brote relacionado cun ximnasio en Arteixo acumulaba o venres 25 contaxios, de acordo cos datos facilitados pola Consellería de Sanidade.

   Deste xeito, a comunidade ten un total de 308 casos activos este sábado, fronte aos 280 do venres, o que supón que Galicia suma nove días de subidas neste indicador.

   En concreto, a área sanitaria na que se volve a producir un maior aumento é a da Coruña, onde hai 20 casos activos máis e o total pasa de 87 a 107. Soben tamén as cifras en Vigo, que suma outros oito, ao pasar de 48 a 56; en Santiago, onde se elevan de 23 a 26 --tres máis--; en Ourense, que sobe de 15 a 17 --dous máis--; e en Pontevedra, que rexistra un caso activo máis que hai un día e acumula 26.

   Na área de Ferrol os casos seguen en dous, os mesmos que este venres, mentres que a área de Lugo rexistra o único descenso, con seis casos activos menos. En concreto, o dato pasa de 80 a 74.

HOSPITALIZACIÓNS

   No tocante a hospitalizacións, increméntanse nun caso, até as 13. Ademais, unha persona segue na UCI, mentres que 294 permanecen no seu domicilio --27 máis que o venres--.

   Até este sábado, Galicia rexistra un total de 11.289 curados --17 máis que no parte anterior-- e 619 falecementos, dos que 274 están relacionados con residencias de maiores. A cifra de mortes que deixa a pandemia na Comunidade permanece sen variación desde o pasado 10 de xuño.

DOUS CASOS EN RESIDENCIAS

   En canto aos casos de COVID en residencias, mantéñense en dous, despois de que onte transcendese un novo contaxio, xa que deu positivo un traballador da residencia de maiores de Paradela, en Lugo).

   Este caso súmase ao positivo dunha traballadora dun centro de Xove (Lugo) que, segundo fontes próximas, contaxiouse, do mesmo xeito que outros familiares, por unha visita procedente de Cataluña.

   O número de PCR realizadas en Galicia até o momento é de 251.685, 1.673 máis con respecto aos datos do venres.

Contador