SANTIAGO DE COMPOSTELA, 30 Mar. (EUROPA PRESS) -
O presidente da Fegamp, Alberto Varela, asegurou este luns que, pese á repartición de material realizada estes días, os concellos galegos seguen en "unha situación bastante precaria e necesitada" en canto a medios de protección contra o COVID-19.
Así o trasladou Varela durante unha reunión do Centro de Coordinación Operativa (Cecop) a representantes do Goberno galego e estatal, a quen pediu "novas reparticións de material".
Os municipios, lembrou Alberto Varela, "atenden a 24.000 dependentes", e, a pesar das reparticións de elementos de protección, continúan nunha situación "necesitada".
A Xunta, pola súa banda, trasladoulles que esta semana haberá novas reparticións de material, nos que, lamentou Varela, "quedarían aínda á marxe o sete grandes cidades". "Eles tamén necesitan material e débese facer un esforzo dada a importancia das actividades dos concellos", subliñou.
Tras garantir a "leal colaboración" das entidades locais coa Xunta e o Goberno central nesta situación, o presidente da Fegamp reivindicou as accións que están a levar a cabo os municipios, como, por exemplo, o labor de desinfección que realizan os servizos locais de emerxencias ou a posta a disposición dos transportistas de puntos de descanso nos seus pavillóns.
