SANTIAGO DE COMPOSTELA, 30 Jun. (EUROPA PRESS) -
Os pacientes con positivo en coronavirus COVID-19 ingresados en hospitais de Galicia mantéñense en catro --na Coruña, Vigo e Lugo--, os mesmos desde a fin de semana, mentres que as UCIs galegas seguen sen hospitalizados coa infección.
Segundo os datos facilitados este martes polas áreas sanitarias de Galicia, na da Coruña e Cee permanece un paciente con COVID ingresado en planta do Chuac. Ademais, rexistrouse catro altas epidemiolóxicas máis.
Na área de Vigo dos 129 casos activos, un corresponde a un paciente hospitalizado e 128 atópanse en seguimento no seu domicilio. Até a data curáronse 2.058 persoas.
Na provincia de Lugo hai 49 casos activos, o que supón cinco máis que este luns, dos cales dous corresponden a pacientes ingresados no HULA e no Hospital da Mariña --un en cada caso-- e 47 atópanse en seguimento domiciliario --cinco máis que a xornada pasada--. Até a data nesta área faleceron 28 persoas e rexistráronse 922 altas.
Pola súa banda, na área de Pontevedra e O Salnés os casos activos sitúanse en dez, un máis que o luns, todos eles en seguimento domiciliario. Desde o inicio do plan de continxencia da COVID-19 curáronse 893 pacientes e houbo 16 falecidos.
Na área sanitaria de Ourense os 21 casos activos, un menos que este luns, corresponden a pacientes en seguimento domiciliario. Esta provincia rexistra 1.863 persoas curadas e 132 falecidas. Até o momento levou a cabo 25.328 PCR.
Mentres, a área Sanitaria de Santiago e Barbanza mantense con 24 casos activos e segue sen pacientes hospitalizados desde o pasado venres. Até o momento os pacientes curados ascenden a 1.739 e as PCR realizadas sitúanse en 28.588.
E na área de Ferrol os casos activos seguen en 11, todos eles en seguimento domiciliario. Até a data suma 571 casos non activos e 33 falecidos.
