SANTIAGO DE COMPOSTELA, 20 Nov. (EUROPA PRESS) -
Parte da frota pesqueira galega permanece amarrada a porto este mércores debido ao temporal costeiro que mantén activada a alerta laranxa nas provincias da Coruña e Pontevedra.
Segundo confirmaron a Europa Press fontes de lonxas e confrarías de Galicia, os barcos pesqueiros permanecen en porto en localidades coruñesas como Corcubión e Muxía, así como parte da frota de Laxe. En zonas como Cariño e O Barqueiro puideron, con todo, faenar.
Na provincia de Pontevedra a maioría da frota está amarrada en portos como Baiona, Bueu e A Guarda polo mal tempo no mar, mentres que en zonas como Cangas puideron faenar con normalidade.
Mentres, no litoral da provincia de Lugo, onde o aviso por ondada é amarelo este mércores, a frota saíu a faenar en localidades como Ribadeo, pero as fontes consultadas apuntaron que "non tardarán en volver" polo empeoramento do estado do mar.
ONDAS
Segundo os rexistros de boias de Portos do Estado até o mediodía, alcanzáronse os 4,92 metros de altura na zona de Estaca de Bares e os 4,45 metros na de Cabo Vilano-Sisargas.
A Dirección Xeral de Emerxencias e Interior da Vicepresidencia da Xunta activou a alerta laranxa por temporal costeiro nas provincias da Coruña e Pontevedra.
A Axencia Estatal de Meteoroloxía (Aemet) indica que o fenómeno meteorolóxico adverso costeiro de nivel laranxa afecta a todo o litoral das provincias da Coruña e Pontevedra con ondas de catro a seis metros, por mar combinada do oeste-noroeste.
