Foron detidas nove persoas e realizados cinco rexistros no Vao, Vilaboa, Poio e Sanxenxo
PONTEVEDRA, 15 Feb. (EUROPA PRESS) -
Axentes da Policía Nacional e a Axencia Tributaria desarticularon un grupo criminal "especialmente activo", destacaron, que se dedicaba á recepción e distribución de sustancia estupefaciente nos poboados marxinais de Galicia. No operativo foron detidas nove persoas e realizáronse cinco rexistros domiciliarios en varias localidades pontevedresas.
Segundo informou a Policía Nacional, a operación, denominada 'Gepetto', foi desenvolvida polas unidades de droga e crime organizado (Udyco) e a unidade de tráfico medio da Policía Nacional de Pontevedra.
A investigación iniciouse hai uns meses cando os axentes policiais detectaron unha compra de haxix no Campo de Xibraltar por parte dun individuo afincado na zona de Sanxenxo para a súa posterior venda en Galicia.
Este home mantiña unha gran vinculación cun distribuidor de heroína no poboado do Vao en Pontevedra. "Grazas ás pescudas dos axentes este individuo foi detido o pasado sábado cando circulaba co seu vehículo e incautáronlle un quilo de cocaína", destacaron as mesmas fontes policiais.
Así, coa súa detención "desencadeouse o inicio da operación Gepetto", asegura a Policía. Os axentes policiais efectuaron cinco rexistros domiciliarios en diferentes localidades de Pontevedra; no poboado do Vao, Vilaboa, Poio e Sanxenxo.
DROGA INTERVIDA
Nestes rexistros foron incautados 1.072 gramos de heroína, 1.073 gramos de cocaína, 12.072 gramos de haxix e 1.295 gramos de sustancia de corte, concretou a Policía Nacional.
Para o desenvolvemento do dispositivo a Policía indicou que se contou co apoio de varias unidades, entre elas os GOES (Grupo de Operacións Especiais), UIP, Guías Caninos, servizo de helicóptero e o GOR da comisaría de Pontevedra.
Os detidos foron postos este venres a disposición do Xulgado de Instrución número 3 de Cangas.