SANTIAGO DE COMPOSTELA, 25 May. (EUROPA PRESS) -
O director Rodrigo Sorogoyen, premiado pola película 'El Reino', ten en "proxecto" rodar en Galicia e contar, de novo, co actor galego Luís Zahera entre o plantel.
No escenario Estrella Galicia do 'Festival de Cans' do Porriño (Pontevedra), Sorogoyen, acompañado de Zahera e do director do certame Alfonso Pato, avanzou que "ten en mente" a idea dunha película "que se gravará nunha aldea de Ourense, que aínda está por localizar".
"Tratará sobre unha parella de estranxeiros que veñen vivir aquí, con dous personaxes galegos moi potentes, un deles é de Goya e ofrecinllo a Zahera", desvelou.
O multipremiado director confesou como viviu os seus dous últimos anos, nos que a súa fama foi en ascenso. "Foi unha tolemia, sobre todo o tempo que pasou entre a rodaxe de El Reino e da curtametraxe Madre. O meu equipo e eu tivemos moita sorte de que as dúas pezas gustasen tanto, recibín moi boas palabras do público e iso alégrame moito e dáme forzas para seguir traballando. Este tempo foi unha nebulosa, non me acordo moito de estar no Festival de San Sebastián nin dos Óscar".
Tamén explicou que a primeira idea que quería transmitir con El Reino era mostrar como actúan os políticos das altas esferas, pero o guión que Sorogoyen realizou con Isabel Pena acabou dando un xiro até centrarse nun político dun rango menor, co obxectivo de que o espectador empatizara coa figura do corrupto.
Xunto a Sorogoyen estivo Luís Zahera, que gañou o premio Goya ao Mellor actor secundario polo Reino e que definiu ao realizador madrileño como "un director distinto", un "director de contacto", porque é o autor do texto e "o coñece moi ben", polo que "ten outras dinámicas".
Zahera non ocultou a súa satisfacción por obter o premio Goya: "Gañar un Goya ten o que lle chamo o factor surfeiro, cando colles unha boa onda".
O Festival acolleu outros momentos durante este a mañá deste sábado, como o CanSonoro, con Xurxo Souto, unha ruta chea de música, ou a proxección da sección Ultravioleta.
