Alertan de que "hai 113.589 parados sen ningún tipo de cobertura" na Comunidade
SANTIAGO DE COMPOSTELA, 2 Sep. (EUROPA PRESS) -
Os principais sindicatos galegos, UGT, CC.OO. e CIG referíronse aos datos do paro dados a coñecer este martes en Galicia para lamentar que, malia o descenso en agosto de 3.340 desempregados respecto ao mes anterior, existe "un crecente" número de desempregados sen prestación, tan só o 5,7% das novas altas foron contratos indefinidos e este descenso de parados se realiza "a custa da perda de dereitos".
Neste sentido, se ben UGT saúda "o bo dato" de desemprego rexistrado en Galicia, que se atopaba en niveis "insostibles", denuncia que hai unha "preocupante" cifra de beneficiarios con prestación que "segue baixando", de forma que "hai 113.589 parados" sen ningún tipo de cobertura", os cales están "en risco de exclusión social".
O número de parados rexistrados nas oficinas dos servizos públicos de emprego (antigo Inem) baixou en agosto en Galicia en 3.340 persoas respecto ao mes anterior (-1,39%), co que en total se sitúa en 236.939 desempregados.
Sobre esta cuestión, UGT chama a atención respecto a que "hai unha contracción na poboación en idade de traballar" pola saída de poboación cara a fóra e o retorno de inmigrantes cara aos seus países de orixe".
Ademais, sinala as diferenzas por sexos no descenso do paro, pois a redución intermensual en homes é do -2,39% fronte ao -0,48% de mulleres, ao igual que na interanual (homes, -10,1%; e mulleres, -5,99%). Xunto a isto, considera que a cifra de afiliados á Seguridade Social de 941.638 persoas, malia aumentar un 0,59% respecto ao mes anterior, "segue sendo un dato realmente preocupante".
CIG, "PREOCUPANTE" NÚMERO DE INDEFINIDOS
Pola súa banda, o sindicato CIG chama a atención sobre "a preocupante" cifra de altas laborais baixo algunha das modalidades de contratos indefinidos, que son "só o 5,7%" das novas altas, das cales o 80% correspóndense ao sector servizos e os máis novos a penas se benefician destes.
Así, a CIG achaca este descenso en Galicia á estacionalidade do mes de agosto e non ao feito "dun cambio de ciclo", como quere facer crer o Goberno". Ademais, denuncia que tras os datos se esconde "a explotación e emigración da xuventude".
"Nesta liña, o sindicato nacionalista que cada vez hai menos desempregados cobrando unha prestación contributiva e cada vez hai menos cobrando subsidio".
CC.OO., MELLORA "CON DATA DE CADUCIDADE"
Ao respecto, CC.OO. considera que a mellora dos datos de desemprego en Galicia teñen "data de caducidade", xa que a considera "estacional", ao tempo que recriminan que teña lugar "a custa da perda de dereitos".
E é que o sindicato recorda que "a falta de traballo e expectativas seguen provocando o abandono do mercado laboral galego", co aumento de desigualdades e "a volta á emigración".
Xunto a isto, remarca que no último ano a afiliación á Seguridade Social sobe menos en Galicia que no conxunto do Estado (un 1,13% fronte ao 1,97%) e apunta que "xa hai case 93.000 persoas paradas" con experiencia laboral que non cobran prestacións por desemprego".
