Unanimidade no Parlamento para volver reclamar ao Estado que recupere o Pazo de Meirás

Pazo de Meirás
EUROPA PRESS - Archivo
Publicado 12/06/2019 14:16:56CET

O PSOE defende a elaboración dun informe previo que faga a demanda "segura" e que "evite unha vitoria da familia Franco"

SANTIAGO DE COMPOSTELA, 12 Jun. (EUROPA PRESS) -

Todos os grupos do Parlamento aprobaron este mércores por unanimidade instar á Xunta a que volva reclamar ao Goberno do Estado que inicie "de maneira urxente" as accións legais "pertinentes" para a recuperación do Pazo de Meirás.

A iniciativa, presentada polo BNG e defendida por Luís Bará, iniciábase lembrando o acordo adoptado tamén por unanimidade en xullo do ano pasado esixindo ao Estado medidas para iniciar a recuperación de Meirás para o patrimonio público, unha reclamación da que afearon a "falta de resposta" do Executivo nacional.

No texto aprobado, todos os partidos con representación no Pazo do Hórreo piden á Xunta que reitere, ante o Goberno central, a esixencia de que inicie "de maneira urxente as accións legais pertinentes para recuperar o Pazo de Meirás para o patrimonio público", á vez que mostran o "rexeitamento" por "o uso deste BIC para facer apología da ditadura franquista e do ditador".

Finalmente, a iniciativa demanda que leven a cabo as accións necesarias para "deixar sen efecto" os títulos nobiliarios do Señorío de Meirás e do Ducado de Franco, vinculados ao Pazo.

UN "ESPOLIO LEGALIZADO"

Durante a súa intervención, o deputado nacionalista Luís Bará lembrou que "se vai a cumprir un ano" do acordo parlamentario, así como dos informes elaborados pola Xunta e a Deputación da Coruña que avalan a reversión deste "espolio legalizado durante a transición coa complicidade das instancias máis altas do Estado".

Con todo, a pesar desta unanimidade, lamentou Bará, "o Goberno de Pedro Sánchez non cumpriu coas demandas e esixencias deste parlamento", tras o que deslizou que, aínda que ten "constancia" de que a demanda de reclamación estaba "para presentar o marzo", "alguén a mandou parar".

"Hai que exhumar todo o franquismo que temos enterrado", dixo o deputado nacionalista, que reiterou a intención do BNG de "pór este tema na axenda política". "O BNG non se amedrenta ante a familia Franco", dixo, tras o que animou a "limpar dunha vez por todas eses pozos negros da transición". "A pelota está no tellado do Goberno socialista", a resolto.

O PSOE DEFENDE OS SEUS PASOS

Precisamente a deputada socialista Concepción Burgo interveu para defender os pasos dados polo Goberno socialista, que "demostrou o seu compromiso nesta materia". Nesta liña, dixo, encargouse un informe á asesoría xurídica para ter "absoluta seguridade xurídica de poder recuperar o pazo" antes de presentar a demanda.

Concepción Burgo asegurou que o actual é "un momento moi difícil", no que é "absolutamente necesario" que a demanda civil "sexa segura e evite unha vitoria da familia Franco", como, lembrou, sucedeu en primeira instancia coa reclamación das estatuas do Pórtico da Gloria.

"O que levemos aos tribunais, temos que estar absolutamente seguros, porque non podemos dar nin unha vitoria máis aos Franco", sentenciou. En consonancia, o grupo socialista presentou unha emenda, que non foi incorporada ao texto final, pedindo ao Goberno que "conclúa" no "menor tempo posible" os informes previos ao comezo das accións civís, así como que se estenda a anulación de títulos nobiliarios.

NON "DESFACER O CAMIÑO ANDADO"

Pola súa banda, o Grupo Popular tamén presentou unha emenda na que, entre outras cuestións, suprimíase o mandato para anular os títulos nobiliarios, algo que Bará rexeitou retirar da iniciativa.

No entanto, a deputada popular María Antón apelou ao "espírito construtivo" alcanzado hai un ano para garantir que o PP non avogaba por "desfacer o camiño andado", polo que votaron tamén a favor da iniciativa.

Finalmente, o grupo de En Marea, en voz de Ángeles Cuña, cualificou de "importantísimas" as iniciativas de "loita contra a impunidade" e apostou pola unión dos "demócratas" nesta cuestión. Aínda que admitiu que a recuperación de Meirás "urxe", Cuña admitiu que "é moi importante que se faga coas mellores garantías" de éxito.

Contador