SANTIAGO DE COMPOSTELA, 29 Ago. (EUROPA PRESS) -
O candidato de En Marea á Presidencia da Xunta, Luís Villares, acusou ao xefe do Executivo galego, Alberto Núñez Feijóo, de propoñer un debate "á súa medida" porque "evita medirse cara a cara coa única alternativa ao seu desgoberno, que é a marea galega".
Nunha comparecencia de prensa celebrada este luns na que Villares anunciou as propostas de En Marea en materia de medios de comunicación, o maxistrado en excedencia cualificou de "claramente insuficiente e empobrecedora" a proposición de debate electoral que tería lugar o próximo 12 de setembro.
Na proposta, trasladada dende a Compañía de Radio e Televisión de Galicia (CRTVG), participarían os candidatos de PP, PSdeG, BNG, En Marea e Ciudadanos, xa que o ente público entende que ou ben son formacións que xa obtiveron representación nos anteriores comicios autonómicos ou teñen carácter de "forzas políticas significativas".
Para Villares, Feijóo ofrece un debate a cinco "coma se repartise beneficencia" coa pretensión de "diluír o conxunto de alternativas políticas" para sortear a "posibilidade de confrontación clara, intensa e extensa de programas".
Ademais, cre que o líder dos populares galegos non se quere enfrontar "cara a cara" con En Marea porque esta formación é "quen realmente está a constituír neste momento unha alternativa ao PP en Galicia".
Así mesmo, aclarou que non descarta a celebración doutro debate nalgún medio de comunicación privado, que sería un "ámbito idóneo sempre que nos medios públicos estean garantidos (os debates) en primeiro lugar".
