SANTIAGO DE COMPOSTELA, 15 Jul. (EUROPA PRESS) -
O vicepresidente da Xunta en funcións, Alfonso Rueda, pediu este mércores á administración central, que é quen ten "a responsabilidade de facelo", que faga "todo o necesario" para que os votos de residentes no exterior cheguen "a tempo" para o escrutinio, que comezará o luns da próxima semana.
En resposta a preguntas da prensa após unha comparecencia para presentar un programa de apoio ao emprendimiento feminino, Rueda manifestou que "eses votos non poden andar por aí perdidos nin se pode dicir que non chegan a tempo", cando faltan cinco días para o luns.
Correos recoñeceu problemas co voto do censo de residentes ausentes (CERA) en varios países, como Venezuela, onde non chegaron as papeletas porque non se atopou transporte "público nin privado", e Cuba, onde dixo que o correo do país non repartiu a documentación. Do voto exterior depende un escano na provincia de Pontevedra, en pugna entre PSdeG e PPdeG.
Rueda indicou que confía en que os votos que faltan por chegar estean xa no seu destino o luns e "poidan ser contados nas catro provincias". "Na de Pontevedra é onde está o foco porque é onde pode variar o resultado, pero nas outras provincias deben ser contados e deben sumar ao final, con independencia de que cambien ou non cambien escanos", destacou.
Ademais, lamentou que votantes residentes no exterior que pediron o voto non puidesen emitilo, pero dixo que "lamentaría máis" que quen si entregaron a súa papeleta vexan que non chega a tempo. "Sería moi triste e moi difícil de explicar", insistiu.
Rueda lembrou que o sistema para votar desde o exterior é "complexo", co voto rogado. "Isto serve tamén para darnos conta de que non se pode dar unha situación como a que se deu nestas eleccións", declarou.
"NON É DE RECIBO"
Ao seu xuízo, "non é de recibo" e a Xunta púxoo "de manifesto" e propuxo alternativas desde a semana pasada, cando recibiu informacións de Correos e a Xunta Electoral dos problemas que se estaban rexistrando. As competencias para garantir o dereito a sufraxio do CERA é, afirmou, de Correos e do Ministerio de Exteriores e as embaixadas e consulados.
"Nós transmitimos esta inquietude e propuxemos solucións a semana pasada e, polo que se ve, esas solucións non foron tomadas", recriminou. "Xa non podía ser que a xente que pediu o voto non puidese facelo", engadiu e considerou que "probablemente" nalgúns casos non se esgotaron "todas as posibilidades para que ese voto puidese ser exercido".
"O que non se puido emitir, non se puido emitir e esperemos que isto non volva pasar", proseguiu e repetiu que os que están emitidos deben chegar para o reconto.
