SANTIAGO DE COMPOSTELA, 3 Jul. (EUROPA PRESS) -
O expresidente do Goberno José Luis Rodríguez Zapatero asegurou que a Galicia "viva, aberta, progresista" debe comparecer o próximo día 12 de xullo nas urnas "votando" ao socialista, Gonzalo Caballero, un candidato á Xunta que "sente o que di".
"A min nunca me gustaron os candidatos de pedra ou de xeo. Hai que gobernar sentindo o que se di", manifestou Zapatero nun acto en Santiago de Compostela en apoio á candidatura de Gonzalo Caballero, quen previamente se emocionou ao trasladar o seu compromiso coa educación pública e a igualdade dos menores con diversidade funcional.
Na súa intervención, Zapatero sinalou que "estas eleccións, as primeiras despois da crise, son as máis importantes que viviu Galicia" xa que, segundo indicou, definirán a sociedade que se vai a vivir e os seus "valores e prioridades".
Por iso, despois de contrapor o modelo dos políticos que "arriman o ombreiro" en momentos difíciles a aqueles que "pon cambadelas", pediu o voto para os socialistas galegos para unha saída da crise baseada en dous alicerces: "a solidariedade e a cooperación".
