SANTIAGO DE COMPOSTELA, 3 Mar. (EUROPA PRESS) -
A elección do reitor da Universidade de Santiago de Compostela (USC) celebrarase o vindeiro 10 de maio de 2006 nun proceso electoral no que tamén se elixirán aos representantes no Claustro Universitario, nas Xuntas de Centro, e nos Consellos de Departamento.
Segundo o acordado pola Comisión Electoral Central na xuntanza celebrada hoxe, o vindeiro luns día 6 publicarase o censo provisional, e abrirase ata o día 13 o prazo para presentar reclamacións a esta listaxe ante a Secretaria Xeral.
Unha vez finalizado este período, o día 23 do mesmo mes publicarase o censo electoral definitivo. Deste xeito, a presentación de candidaturas realizarase entre o 24 de marzo e o 3 abril, e a proclamación definitiva de candidatos o 24 de abril.
Pola súa banda, a campaña electoral desenvolverase entre o 25 de abril e o 8 de maio, para ter lugar a votación o día 10 dese mes. Segundo informou a USC, as persoas interesadas en exercer o voto anticipado poderán facelo os días 4, 5 e 8 de maio.
Ás eleccións a reitor presentaranse, presumiblemente, dúas candidaturas. Por unha banda, o actual responsable da USC, Senén Barro, optará a renovación do cargo nunha candidatura conxunta das tres plataformas organizadas de profesorado; Plataforma Universitaria Progresista (PUP), Universidade Aberta (UA) y Converxencia Universitaria (CU). Por outro lado, preséntase como independente o profesor Juan José Casares.
