SANTIAGO DE COMPOSTELA, 28 Mar. (EUROPA PRESS) -
O Centro Dramático Galego (CDG) representa esta semana as últimas funcións de 'Illa Reunión' no Salón Teatro de Santiago, o espectáculo dirixido por Ana Vallés polo que se exploran as diversas posibilidades expresivas do teatro, a música e a danza.
Tras estas cinco representacións en Compostela, que terán lugar dende mañá ao sábado ás 20.30 horas e o domingo ás 18.30, o CDG iniciará unha xira durante a que visitará outros sete escenarios galegos.
As entradas poden adquirise no despacho de billetes do Salón Teatro dende dúas horas antes do comezo das funcións a un prezo de 9 euros, excepto o domingo, día do espectador, que estarán a 4,50 euros. Ademais, o CDG ten habilitado un teléfono, o 981 581 572, en horario de 9.00 a 14.00 horas, para reservas.
A acción da obra desenvólvese nun espazo escénico que ten a súa principal vestimenta nos diversos matices da luz creada por Baltasar Patiño e no especial plano sonoro que aporta a música en directo dos instrumentos de vento e de percusión que empregan músicos e actores.
Un elenco de 14 actores, bailaríns e músicos interpreta unha interpretación coral que durante toda a obra se mantén nun plano paralelo ao das intervencións individuais. Nestas, os intérpretes comunican historias reais, propias e alleas, fundamentadas nos sentimentos contraditorios desatados por viaxes transcendentais nas súas vidas.
