SANTIAGO DE COMPOSTELA, 10 Ene. (EUROPA PRESS) -
A Deputación de Pontevedra estudará colaborar coa Escola de Arte Dramático de Galicia, segundo manifestou hoxe o vicepresidente e deputado delegado de Cultura, Jose Juan Durán, tras recibir a Manuel Viéitez, director da devandita entidade formativa.
O director da Escola Superior de Arte Dramático de Galicia solicitou a colaboración da institución provincial con diferentes iniciativas que pretende levar adiante esta entidade. Segundo informou o vicepresidente da Deputación, "Manuel Viéitez propúxonos un proxecto moi interesante polo que nas vindeiras semanas estudaremos posibles vías de colaboración".
José Juan Durán manifestou que "a Deputación está interesada en establecer canles fluídas de colaboración coa escola". Lembrou que a provincia de Pontevedra "conta cun colectivo importante de asociacións culturais que desenvolven iniciativas de teatro afeccionado, concellos que teñen en marcha aulas municipais de teatro e a nivel de escolas e facultades tamén se desenvolven actividades relacionadas coa interpretación".
Polo momento non se acordaron proxectos concretos pero, segundo explicou José Juan Durán, unha posible actividade sería a posta en marcha de cursos e actividades formativas en diferentes puntos da provincia, ademais dos proxectos que se puidesen desenvolver na propia escola.
TITULACIÓN
A Escola Superior de Arte Dramática, único centro formativo oficial de teatro en Galicia, foi creada por decreto de xullo do pasado ano 2005. Trátase dun centro dependente da Consellería de Educación que ofrece unha titulación equivalente a unha licenciatura en todos os efectos como "titulado superior de Arte Dramática".
O centro está ubicado provisionalmente no instituto de Bouzas, en Vigo, e conta o actual curso con 36 alumnos. Non obstante, está previsto que o ano 2006-2007 poidan cursar estes estudios 72 alumnos; e no exercicio 2008-2009 máis de 300 universitarios.
