SANTIAGO DE COMPOSTELA, 4 Abr. (EUROPA PRESS) -
A incubadora de empresas Uninova participa como socia no proxecto europeo Transtic 'Programa Transfronterizo para a Consolidación de Redes de Cooperación entre Empresas TIC', iniciativa que pretende impulsar a xeración de contactos e relacións de cooperación comercial ou tecnolóxica tanto entre empresas vinculadas ao sector das Tecnoloxías da Información e as Comunicacións, como entre estas e as pequemas e medianas empresas (pemes), potenciais demandantes do seus servizos.
No proxecto tamén participan o Centro de Empresas e Innovación de Galicia (BIC Galicia), a Confederación de Empresarios de Pontevedra, a Asociación de Novos Empresarios de Galicia, e o Consorcio da Zona Franca de Vigo, representando a Galicia, e a Oficina de Innovaçao Empresarial e a Associaçao Universidade Empresa para o Desenvolvemento, ambas as dúas de Portugal, segundo informou a Universidade de Santiago (USC).
Co desenvolvemento deste proxecto, enmarcado na iniciativa Interreg III, os seus promotores agardan fomentar a aparición de oportunidades de negocio transfronteirizas das microempresas, aproveitando as novas oportunidades ofrecidas polas TIC.
As accións incluídas na axenda deste proxecto europeo se materializarán na creación dunha plataforma de seguimento e soporte a novos proxectos empresariais no ámbito da Sociedade da Información na área xeográfica de Galicia e Norte de Portugal.
Esta plataforma prestará un conxunto de servizos dirixidos a micro e pequenas empresas de nova creación, así como a aquelas xa consolidadas co obxecto de crear unha rede de apoio para potenciar o desenvolvemento de proxectos empresariais no ámbito da Sociedade da Información.
