Innova.- A USC concede os Premios á Innovación educativa a cinco traballos que impulsan procesos de mellora do ensino

SANTIAGO DE COMPOSTELA, 26 Jul. (EUROPA PRESS) -

O reitor da Universidade de Santiago, Senén Barro, entregou hoxe os Premios á Innovación Educativa na Universidade na súa edición de 2005 promovidos polo Instituto de Ciencias da Educación (ICE) a cinco traballos que afondan no fomento da innovación educativa no ensino superior para dar pulo aos procesos de mellora da ensinanza e aprendizaxe.

Os premios, dotados con 1.800 euros e diploma acreditativo, por decisión unánime do xurado recaeron nos traballos 'As visitas didácticas como actividade formativa: unha experiencia de innovación educativa na USC', de Quíntin Álvarez Núñez, da Facultade de Ciencias da Educación; e 'Nueva herramienta didáctica para el diseño de agrupaciones de antenas de dipolos teniendo en cuenta los efectos de acoplo mutuo', do que é responsable o profesor da Facultade de Física Francisco José Ares Pena.

Na lista de premiados se inclúe 'Apoio virtual á realización de proxectos fin de carreira', coordinado polo docente da Escola Politécnica Superior de Lugo Martín Barrasa Rioja; 'A xeometría a través da historia', a cargo de Mª Teresa Fernández Blanco, da Facultade de Ciencias da Educación; e 'Programa de autoaprendizaxe no Diagnóstico Diferencial das principais enfermidades de natureza infecto-contaxiosa que causan alteracións reprodutivas no gando vacún. VACVET', encabezado por Mª Luisa Sanjuán Hernán-Pérez, da Facultade de Veterinaria.

O xurado valorou, de acordo coas bases da convocatoria, que os traballos premiados afonden no fomento da innovación educativa no ensino superior para dar pulo aos procesos de mellora do ensino-aprendizaxe nos centros e departamentos da Universidade de Santiago, e contribuír á colaboración institucional na construción do espazo europeo de ensino superior, tendo como referencia os principios fundamentais expresados na Declaración de Bolonia de 1998.

O acto, celebrado no Salón de Graos do Colexio de San Xerome, contou ademais coa presenza da vicerreitora de Calidade e Planificación, Mª Paz García Rubio, así como dos membros do xurado encargados de avaliar os traballos presentados a concurso.

BASES

A estes premios podianse presentar as experiencias de innovación en materias regradas da USC, realizadas por centros, institutos, departamentos ou equipos docentes e investigadores da Universidade de Santiago.

O contido debía tratar sobre unha experiencia educativa innovadora realizada no ámbito da USC nos últimos tres anos e que supoña algún tipo de práctica docente susceptible de ser ampliada e mesmo xeneralizada a outros contextos do ensino superior, tanto dentro como fóra da USC. A experiencia terá sempre relacións con algún tipo de actividade con posibilidade de incidir na mellora do ensino e da aprendizaxe na universidade.

As propostas presentadas debían estar referidas a algunhas das seguinte temáticas Titoría universitaria; Novas tecnoloxías no proceso de ensino-aprendizaxe; Practicum das diferentes titulacións; Metodoloxías docentes innovadoras e avaliacións das aprendizaxes; e Experiencias que vinculen as aprendizaxes do alumnado con marcos de extensión universitaria (voluntariado, proxectos sociais ou culturais, entre outros.