SANTIAGO DE COMPOSTELA, 21 Abr. (EUROPA PRESS) -
Os mozos galegos do exterior terán prazas específicas no programa de campamentos de verán da Xunta. O vicepresidente do Goberno autonómico, Anxo Quintana, participou hoxe na Casa da Parra nun encontro con mozas, mozos e responsables de centros galegos de toda Europa, en concreto, de Francia, Holanda, Bélxica, Dinamarca, Portugal, Reino Unido, Alemaña, Suecia e Italia.
Esta xuntanza, na que tamén participou o director xeral de Xuventude e Solidariedade, Rubén Cela, enmárcase dentro do programa Xuventude da Unión Europea. Quintana destacou a importancia de encontros coma este, que impulsan a posta en común de experiencias e iniciativas por parte de mozos e mozas de toda Europa.
No transcurso do encontro, Anxo Quintana anunciou que dende a Vicepresidencia, dentro dos campamentos de verán da Dirección Xeral de Xuventude, este ano se reserva unha partida de prazas para os mozos e mozas galegos no exterior ou descendentes de galegos. Quintana animou aos fillos e fillas de emigrantes a participar activamente nestes campamentos, xa que lles permitirá relacionarse con outros rapaces e rapazas galegos, o que os aproximará máis á nosa realidade.
O vicepresidente salientou ademais que, como iniciativa pioneira tamén, todos os centros galegos no exterior -aproximadamente 200- van recibir puntualmente exemplares do InfoXove, o boletín de información xuvenil que cada mes, a partir de maio, sacará á rúa a Dirección Xeral de Xuventude e Solidariedade. Destacou, por outra parte, que o InfoXove incluirá unha sección permanente e rotativa entre todos os centros galegos, na que se vai reflectir a situación da mocidade no exterior.
