O reitor da USC acepta a dimisión do vicerreitor de Terceiro Ciclo e Extensión Docente presentada por "razóns persoais"

SANTIAGO DE COMPOSTELA 21 Mar. (EUROPA PRESS) -

O reitor da Universidade de Santiago (USC), Senén Barro Ameneiro, aceptou hoxe a dimisión de Marcelino Agís Villaverde como vicerreitor de Terceiro Ciclo e Extensión Docente, presentada por "razóns de índole persoal" para abandonar o Consello de Dirección do que forma parte desde xuño de 2002.

Con anterioridade ao seu cargo de vicerreitor, Marcelino Agís fora asesor adscrito á Vicerreitoría de Profesorado para temas de planificación docente e membro da Comisión de Titulacións e Programas de Estudo da USC.

Profesor titular de Filosofía na USC, Agís imparte docencia nas facultades de Filosofía e Filoloxía, ademais de colaborar habitualmente en prensa diaria con artigos de divulgación filosófica.

Asemade, foi profesor visitante na universidade italiana de Perugia e convidado, entre outras, na Technische Universität de Berlin (Alemaña) e nas portuguesas de Coimbra, Porto, e no Instituto Superior de Psicoloxía Aplicada de Lisboa.

Ademais, exerceu como membro fundador e secretario da Sociedade Interuniversitaria de Filosofía, organizadora dos Encontros Internacionais de Filosofía, así como do Consiglio Directivo do Centro Internazionale per lo Studio del Simbolo, con sede en Siena.