A Universidade de A Coruña inaugura hoxe o curso 'II República Española. 75 anos de memoria'

A CORUÑA, 26 Jul. (EUROPA PRESS) -

A Universidade de A Coruña inaugura hoxe a novena edición do Curso de Pensamento Carlos Gurméndez que se celebra en Pontedeume ata o 28 de xullo, baixo o título 'II República Española. 75 Anos de Memoria', que está organizado pola institución académica, o Club de Prensa de Ferrol e o Concello de Pontedeume, e contará coa participación de máis de 90 inscritos.

As conferencias están abertas á participación de todo o público e os matriculados obterán dous créditos de libre configuración, solicitados á UDC, e os profesores non universitarios recibirán 20 horas de formación recoñecidas pola Consellería de Educación e Ordenación Universitaria.

O acto de inauguración contará coa presenza do presidente da Comisión de Cultura da Deputación de A Coruña, Celestino Poza, e o alcalde de Pontedeume, Belarmino Freire. Seguidamente, Isaac Díaz Pardo ofrecerá unha breve conferencia sobre o cartelismo na II República.

A sesión da mañá finalizará coa participación de Lourenzo Fernández Prieto, profesor da Universidade de Santiago, co relatorio 'Memoria e vixencia da República'. Pola tarde, intervirá o profesor da UDC Carlos Velasco para falar sobre a II República en Galicia. A continuación, haberá unha mesa redonda centrada nesa época e a súa influencia nas comarcas de Ferrol e o Eume.

O xoves, o académico da RAG, Xosé Luis Axeitos, abrirá as conferencias, falando sobre as misións pedagóxicas en Galicia. Rosa Cal Martínez, profesora da Complutense de Madrid explicará as políticas de información na II República e Alejandro Finisterre abordará a relación dos poetas editores neste período.

Pola tarde, o historiador Xesús Andrés López Piñeiro disertará sobre Castelao na Arte e na República. A continuación, José Andrés Rojo, sociólogo, escritor e xornalista de 'El País', ofrecerá o relatorio 'As forzas Armadas. Da Monarquía á República. O caso do xeneral Rojo'. O vicepresidente da Xunta, Anxo Quintana, pechará a xornada falando dos políticos galegos na II República.

XORNADA DO VENRES

O venres, a profesora da Universidade de Granada Enriqueta Barranco lembrará ao reitor socialista Alejandro Otero nunha "universidade conservadora". Francisco Martínez López, doutor e experto en medicina psicosomática e psicoanálise, intervirá coa conferencia 'Dependencia versus independencia: Hildegart'.

A media mañán está prevista a participación do investigador hispanista Paul Preston cun relatorio que leva como título 'A República e a política reformadora nos grandes problemas do Estado'. Coa súa intervención pecharanse os actos que terán lugar na Casa da Cultura de Pontedeume.

Na tarde do venres, as actividades trasladaranse ao Pazo de Mariñán, onde haberá o relatorio do doutor en Medicina José Vicente Martí-Boscá 'Os médicos libertarios galegos. Sanidade e sindicación', seguida da intervención do secretario Xeral de Comunicación da Xunta de Galicia, Fernando Salgado, sobre os escritores e xornalistas galegos na II República.

A música poñerá o punto final a esta edición do curso cun concerto a cargo da soprano María Herrero acompañada ao piano por Julio Mourenza.