A CORUÑA, 7 Jul. (EUROPA PRESS) -
A Facultade de Ciencias da Universidade da Coruña (UDC) acollerá a vindeira semana, e por primeira vez, a XXVIII reunión do Grupo de Electroquímica da Real Sociedad Española de Química e o 'IX Iberic Meeting of Electrochemistry', que se desenvolverán entre os días 11 e 13 e congregarán a uns 150 especialistas no tema.
Con todo, o acto inaugural terá lugar xa o luns, día 10, ás 20.00 horas no Paraninfo da Maestranza, ao que acudirán a vicerreitora de Investigación, Concepción Herrero; o vicerreitor de Profesorado, Xosé Luís Armesto; o director xeral de Ordenación e Calidade do Sistema Universitario de Galicia, José Ramón Leis Fidalgo; o presidente do Grupo de Electroquímica da Real Sociedad Española de Química, Enric Brillas Coso; e o presidente do comité organizador e catedrático de Química Física da UDC, Manuel Sastre.
Pola súa banda, as sesións científicas desenvolveranse a partir do martes no salón de actos e en diversas aulas da Facultade de Ciencias e as conferencias terán unha apertura extraordinaria, xa que contarán coa presenza do catedrático de Electroquímica da Universidade de Florencia, Rolando Guidelli, que abordará a relación entre a bioloxía e a química.
Pola facultade coruñesa pasarán outros conferenciantes de prestixio, como Antonio Aldaz, da Universidade de Alicante, que falará sobre nanotecnoloxía; ou o catedrático da Universidade de Coimbra Víctor Lobo, que explicará as características do transporte de ions en disolucións.
