SANTIAGO DE COMPOSTELA, 12 Mar. (EUROPA PRESS) -
A Universidade de Santiago de Compostela organiza, en colaboración coa Deputación da Coruña, un ciclo de música dedicado a Wolfgang Amadeus Mozart (1756-1791) co gallo da celebración do 250 aniversario do seu nacemento.
O primeiro concerto dos catro previstos terá lugar este martes, día 14, dedicado ás obras para piano de Mozart. O recital, que será na Igrexa da Universidade ás 21:00 horas, executarao o pianista Daniel Blanch, que interpretará a Fantasía K. 397 en re menor, a Fantasía K. 396 en do menor, a Sonata K. 283 en sol maior, a Fantasía K. 475 en do menor e a Sonata K. 457 en do menor.
Nos vindeiros concertos, o Shostakovich Ensemble interpretará o 4 de abril un repertorio dos cuartetos de corda e o 18 dese mesmo mes dos quintetos de corda, en tanto que a agrupación Camerata Quiodi se ocupará dos Divertimentos o día 2 de maio, clausurando así o ciclo.
Nun comunicado, a USC sinalou que o ciclo compleméntase con outras actividades académicas que se celebrarán na Facultade de Xeografía e Historia. Así, o 19 de abril horas terá lugar a conferencia Mozart: entre o esquecemento e a gloria, a cargo de José López-Calo. Xa o 2 de maio proxectarase a película Amadeus de Milos Forman, con comentarios de Ángel Luis Hueso Montón; o 3 de maio o filme Don Giovanni, de Josef Losey, comentada por Javier Garbayo Montabes, e, por último, o 10 de maio A frauta máxica, de Igmar Bergman, coa intervención de José Víctor Carou.
