A USC e o Centro de Transfusión de Galicia promoven unha nova campaña de doazón de sangue con SMS entre os estudantes

SANTIAGO DE COMPOSTELA, 6 Mar. (EUROPA PRESS) -

Alumnos das Facultades de Química, Medicina e Odontoloxía, así como das Escolas de Enfermería, Traballo Social e Formación do Profesorado recibirán estes días nos seus móbiles unha mensaxe na que se lles convida a participar na campaña de doazón de sangue que o Centro de Transfusión de Galicia (CTG) desenvolve en distintos puntos do Campus de Santiago xunto coa universidade compostelana.

'A USC e o CTG informa: Comparte Saúde. Martes 7 de marzo. Unidade doazón na Sala de Xuntas. De 10.00 ás 14.30 horas e de 15.30 ás 21.00 horas. Doa sangue' será o texto que os alumnos de Química suscritos ao servizo de mensaxería SMS da USC recibirán nos seus móbiles.

Esta iniciativa proseguirá cun segundo envío a alumnos doutros centros, xa que a campaña de doazón continuará o mércores 8 e o xoves 9 na unidade móbil instalada diante da porta principal da Facultade de Medicina, de 9.30 a 14.30 e de 15.30 a 21.00 horas, para os estudantes de Medicina e Odontoloxía, Traballo Social, Enfermaría e Formación do Profesorado.

Esta iniciativa xa alcanzou no pasado curso académico destacados resultados de convocatoria, xa coa súa posta en marcha o ano pasado conseguiuse que a taxa de doazón no Campus de Compostela se incrementara nun 9%, correxindo a tendencia decrecente de anos anteriores, segundo indicou a organización. Fronte ás 1.985 hemodoazóns do curso 2003-2004, o pasado rexistráronse 2.153.

SMS

Esta iniciativa está enmarcada no conxunto de actividades previstas no convenio asinado entre a USC, Vodafone e Ayco para o fomento de servizos de comunicación de información á comunidade universitaria a través da telefonía móbil.

A difusión de información de interese para os membros da comunidade universitaria a través de mensaxería SMS é unha iniciativa de carácter pioneiro nos ámbitos galegos e estatal, que acadou unha grande acollida no seo da comunidade estudantil, xa que o 70 por cento dos estudantes matriculados na USC se acolleron ao sistema.

Aínda que a información máis importante comunicada por esta vía aos estudantes é a referida ás cualificacións, o sistema abre as portas tamén ao envío de información académica, de servizos, ou de carácter social como a enviada estes días para a captación de doantes de sangue.