O reitor da UDC rexeita a suba de taxas universitarias e esixir máis nota para acceder a bolsas

UDC/EUROPA PRESS

A CORUÑA, 26 Abr. (EUROPA PRESS) -

O reitor da Universidade da Coruña (UDC), Xosé Luís Armesto, expresou o seu rexeitamento á suba das taxas universitarias, así como esixir máis nota aos estudantes que accedan a bolsas, en referencia á última proposta do Ministerio de Educación.

Así mesmo, Armesto informou que a Consellería de Educación convocou aos tres reitores galegos a unha reunión o 2 de maio en Santiago de Compostela, en coincidencia coa celebración dun acto protocolario ese día.

En rolda de prensa, tras a reunión do conselo de Goberno, Armesto posicionouse en contra da suba "tan esaxerada" das taxas universitarias e advertiu de que non terá "repercusión práctica" nas universidades.

Así, sinalou que non son medidas "efectivas nin prácticas para financiar a universidade" e engadiu que "van en contra" das recomendacións da Unión Europea e a OCDE. Ademais, instou a aclarar se ese incremento "é para reducir o déficit das comunidades autónomas".

Armesto precisou, por outra parte, que a suba das taxas "é competencia do Goberno" pero que son as comunidades autónomas as que "toman a decisión, non os reitores", recordou.

NOTA PARA BOLSAS

Por outra banda, non considerou "razoable" esixir máis nota aos estudantes que accedan a bolsas, en referencia á última proposta do Ministerio de Educación, unha medida que, na súa opinión, "vai a en contra do principio de igualdade de oportunidades".

Armesto confirmou tamén que a UDC convocará unha reunión do claustro a mediados de maio para posicionarse sobre a suba de taxas universitarias e recordou que en 2008 esta institución xa fixo pública unha declaración en contra dunha medida que, ao seu xuízo, "dificulta" á universidade o seu labor "de cohesión social", apostilou.