UVIÉU, 22 May. (EUROPA PRESS) -
El presidente del Principáu y secretariu xeneral de la FSA, Adrián Barbón, convocó esti xueves a los grupos parllamentarios pa falar d'una propuesta de reforma del artículu cuatro del Estatutu pa reconocer la oficialidá del asturianu y del gallego-asturianu.
La xunta va celebrase a les 11.30 hores na Sede de Presidencia y van participar los portavoces de los grupos parllamentarios socialista, Dolores Carcedo; popular, Álvaro Queipo; Convocatoria por Asturies-IX-Más País-IAS, Xabel Vegas, y mistu, Covadonga Tomé y Adrián Pumares, y el presidente de l'Academia de la Llingua Asturiana (ALLA), Xosé Antón González Riaño. Asisten tamién la conseyera de Cultura, Política Llingüística y Deportes, Vanessa Gutiérrez, y el director xeneral Acción Cultural y Normalización Llingüística, Antón García.
Pa sacar alantre una reforma del Estatutu faen falta 27 votos favorables. PSOE, Convocatoria por Asturies y la diputada Covadonga Tomé, espulsada de Podemos, sumen 23 votos, polo qu'amás del apoyu del diputáu de Foru Asturies --que na llexislatura pasada reclamó como contrapartida unes midíes fiscales que finalmente paralizaron la reforma énte la negativa d'IX a asumiles-- precisaríase'l 'sí' del PP.
Sicasí, el presidente actual de los 'populares' asturianos, Álvaro Queipo, anque defendió la protección de la llingua propia y declaróse asturianista, insistió na so postura contraria a la oficialidá porque implicaría "obligatoriedá" y recordó que nun llevaben la reforma del Estatutu nel so programa electoral.
Con too, Barbón comprometióse a llevar a la Xunta Xeneral la toma en consideración de la reforma del Estatutu --que saldría alantre con una mayoría simple--, llevala a comisión la proposición pa recoyer la oficialidá y, depués, celebrar una votación definitiva pa, anque nun se consigan los 27 votos necesarios, visualizar asina qu'hai una mayoría a favor de la oficialidá na Cámara.
Andalucía
