Sostién qu'hubo que "optar" ente IX, Podemos y Cs porque la so propuesta d'ampliar la Mesa foi refugada
UVIÉU, 24 Jun. (EUROPA PRESS) -
El candidatu socialista a la Presidencia del Principáu y secretariu xeneral de la FSA-PSOE, Adrián Barbón, esplicó esti llunes que la so formación optó por votar la candidatura d'IX pa la Secretaría Primera de la Mesa de la Xunta Xeneral del Principáu pola so "meyor voluntá d'alcuerdu".
"Ente'l candidatu de Ciudadanos, el de Podemos y el d'IX optamos pol d'IX", dixo Barbón en declaraciones a los medios al términu de la sesión constitutiva del parllamentu asturianu, indicando que los socialistes propunxeron ampliar la Mesa de la Cámara de cinco a seis integrantes pa favorecer la "proporcionalidá" y la pluralidá".
Una opción que treslladaron a tolos grupos pero que "foi refugada". "Nun foi posible negociar con toos", resaltó Barbón, argumentando que nesi escenariu la FSA tuvo que "optar" por ún de los trés candidatos a la Secretaría, decantándose por IX.
Ello ye que remarca que los socialistes, colos sos 20 diputaos de 45, podríen presentar trés nomes con opciones de llograr trés puestos na Mesa y nun lo fixeron. "Creíamos importante dar esa pluralidá, quedando con dos puertos y apoyando otra opción", defendió.
Coles mesmes, Adrián Barbón asegura qu'IX tuvo, dende un primer momentu, "una meyor voluntá d'alcuerdu". Amás, destacó la tradición histórica de rellaciones ente los dos partíos" y, tamién, "de discriminación positiva hacia IX".
Con too, el líder de los socialistes asturianos considera que votar pol candidatu de IU Ovidio Zapico, que va ocupar la Secretaría Primera de la Mesa de la Cámara, en vez de pol candidatu de Podemos, Rafael Palacios, nun tien que condicionar diálogos futuros.
Barbón reseñó que los socialistes nun votaron más qu'a los sos candidatos pa la Presidencia de la Cámara, Marcelino Marcos Líndez, y la Vicepresidencia Primera, Celia Fernández, amás d'al candidatu d'IX pa la Secretaría Primera, Ovidio Zapico; mentes que'l vicepresidente segundu, Pablo Álvarez-Pire (PP), y el secretariu segundu, Armando Fernández Bartolomé (Cs) resultaron escoyíos colos 15 votos que xunieron PP y Ciudadanos.
"Nun hai alcuerdu de nengún tipu más allá del alcuerdu con IX que ye públicu", atayó, asegurando que los socialistes van "siempre cola verdá per delantre".
Con too, repite qu'esti plenu supunxo "puramente la conformación de la Mesa de la Cámara" y que "tolo demás ta por venir" pa tratar la "gobernabilidá d'Asturies". "Convido a toos a que dexemos atrás los bloqueos y falemos de meyora, de diálogu, de puesta en valir y d'escucha activa a los ciudadanos", pide Barbón al restu de formaciones.
