La Cámara devuelve al Gobiernu'l proyectu presupuestariu y lleva a Asturies a la prórroga

Actualizado 20/12/2013 15:22:49 CET
Pleno de la Junta General 20 de diciembre 2013
Foto: DAMIÁN ARIENZA

UVIÉU, 20 d'Avientu (EUROPA PRESS)

   Tal como se prevía'l Parlamentu asturianu devolvió esti vienres al Gobiernu'l proyectu de llei de presupuestos pal 2014 en saliendo alantre les cuatro enmiendes a la totalidá presentaes polos grupos de la oposición, Foru Asturies, PP, IU y UPyD, que se votaron de manera conxunta, tres adoptase esta fórmula na pasada Xunta de Voceros y que contaron con 28 votos a favor y 17 en contra.

   D'esta manera l'Executivu de Javier Fernández quedó solu na so defensa del proyectu presupuestariu y vese obligáu a gobernar coles cuentes del 2013 prorrogaes, un escenariu que según recordó esti vienres la mesma conseyera de Facienda y Sector Públicu, Dolores Carcedo, nun garantiza lo básico y va suponer menos recursos y menos axilidá.

   "Difícil optar pola prórroga cuando se critica la escasez y la lentitú", dixo la conseyera que reclamó, sin éxitu, al restu de grupos, l'apoyu a unes cuentes qu'insistió son "reales y Asturies precísales", anque igual "meyorables coles propuestes del restu de los grupos".

   Anque los motivos polos que cada grupu parlamentariu optó por pidir la devolución de les cuentes al Gobiernu fueron distintos, no que coincidió tola oposición ye en criticar "la irresponsabilidá" del Gobiernu, al que culparon de ser l'únicu culpable de la prórroga presupuestaria.

   Sicasí, dende'l grupu socialista, el so voceru José María Pérez, pidió a los grupos que "tengan el valor" de reconocer los verdaderos motivos polos que decidieron refugar les cuentes presentaes pol Executivu. Unes cuentes, qu'indicó, siguen dando prioridá a les árees a les que se daba nesti exerciciu 2013, cuando contaron col apoyu d'IU y d'UPyD.

RAZONES DE LA OPOSICIÓN

   Dende Foru Asturies, el so presidente y voceru parlamentariu, Francisco Álvarez-Cascos, consideró qu'esta refuga de les cuentes per parte de la totalidá de la oposición marca un cambiu de ciclu y supón "el fin de la hexemonía socialista n'Asturies".

   Pela so parte la vocera del PP, Mercedes Fernández, que de primeres siguía ofreciendo'l so apoyu pa llograr qu'Asturies "tuviera una prórroga d'un mes y non d'un añu", n'escuchando la segunda vez a la conseyera indicó que "los sos peores pensamientos confírmense y queda claro que Javier Fernández ta cómodu con un escenariu de prórroga".

   El voceru d'IU, Ángel González, criticó l'actitú de Javier Fernández, al qu'acusó de torgar que se llegara a un acuerdu refugando hasta debatir les propuestes del so grupu a les cuentes. Asina, encamentó al Gobiernu "nun instalase na prórroga y presentar un nuevu proyectu dende la izquierda".

   Dende UPyD, el so diputáu Ignacio Prendes, reprochó "la teoría de responsabilidá inversa" que, diz, lleva formulando dende va tiempu'l Gobiernu del socialista Javier Fernández, pa culpar a la oposición de la falta d'apoyu a unes cuentes que son "inservibles" pa reactivar l'actividá económica d'Asturies.