Actualizado 24/11/2009 15:35

Una campaña mediática espardirá la toponomia tradicional de los 40 conceyos que la recuperaron hasta agora

UVIÉU, 24 de Payares (EUROPA PRESS)

La Conseyería de Cultura del Gobiernu asturianu anunció güei l'entamu d'una campaña mediática d'espardimientu de la toponimia tradicional de los 40 conceyos qu'hasta'l momentu la recuperaron y oficializaron. Un anunciu en televisión y cine, y cuñes de radio promoverán la utilización de los nuevos términos aprobaos pol Conseyu de Gobiernu del Principáu.

Asina lo anució güei la conseyera de Cultura, Mercedes Álvarez, demientres una rueda prensa ofrecida pa dar a conocer oficialmente la entrada en vixencia de la nueva toponimia de los últimos ocho conceyos que l'aprobaron: Balmonte de Miranda, Mieres, Cangues d'Onís, Sobrescobiu, Yernes y Tameza, Degaña y Parres. Alcaldes o nel so casu conceyales delegaos de toos estos conceyos tuvieron presentes nel actu.

"Una vez superáu nesti añu 2009 la llende de que más de la metá de los conceyos asturianos (40) tengan oficializada la so toponimia tradicional, consideramos que yera'l momentu de dar un fuerte puxu al espardimientu y promoción con una campaña informativa muncho más intensa, arriqueciéndola con nuevos formatos d'espardimientu mediáticu", señaló.

Primero daráse una información específica de la toponimia tradicional oficializada en cada conceyu, y en segundu llugar una información xeneral a la ciudadanía qu'esplique los procesos de cambios de los nomes, y a la so vez d'espardimientu y el so usu n'asturianu.

La campaña consta de cuatro tipos de materiales, dos de conteníu xeneral y dos de conteníu territorial. La xeneral tien por oxetivu informar al conxuntu de la población d'estos cambios de denomación oficial, y consistirá nel espardimientu d'anuncios en televisón, cine y radio. Los anucios en televisón y cine recueyen situaciones de comunicación col usu normal de les formes toponímiques aprobaes, con presencia d'homes y muyeres, de distintes zones y profesiones. Tamién va haber cuñes de radio informando del procesu de revisión. La previsión prollongaráse hasta'l 7 de xineru del 2010.

La territorial centra'l so oxetivu n'espardir la toponimia nos últimos conceyos aprobaos. Compónse de dos actuaciones distintes: realización de material impresu (folletos de los conceyos colos nomes de los llugares); y anuncios en prensa qu'apaecerán dende mañana mesmu en tolos periódicos.

TRABAYU CON TOLES ALMINISTRACIONES

La campaña tien un importe global de 96.926 euros, "una apuesta importante", según la conseyera. "Trabayamos siempre nesta materia cola máxima sensibilidá y respetu, de manera participativa y consensuada. Supón miles y miles de nomes de llugar y ye sin duda una satisfacción pa esti gobiernu y pa los gobiernos municipales, que toos estos procesos y modificaciones fueren bien recibíos pola xente", comentó Álvarez. Reconoció qu'hubo casos nos que se plantegó "dalgún tipu de desacuerdu o controversia", como'l de La Pola Siero o Quimarán (Carreño), pero señaló que fueron "escasos y puntuales, y que son la esceición que confirma la salú d'esti procesu".

Entrugada por si hai comunicación con otres alministraciones y instituciones pa concienciar del usu de la nueva toponimia, esplicó que "a midida que s'aprueba la toponimia oficial, la Conseyería de Mediu Ambiente, Ordenación del Territoriu y Infraestructures, regula colos nuevos topónimos oficiales les carreterers y autovíes, tamién les de nueva construcción, al tiempu que va sostituyendo progresivamente la rotulación nes carretres de la so competencia". "De la mesma manera", continuó, "los conceyos van adautando progtresivamente la rotulación de les sos carreteres y los sos caminos a la nueva toponimia oficial". "Amás, nel ámbitu autonómicu, tiense en cuenta esta toponoimia na revisión del mapa oficial d'Asturies, nos ortofotomapes y nos criterios del Centru de Cartografía, dependiente de la Conseyería de Mediu Ambiente, Ordenación del Territoriu y Infraestructures", acabó.

Asturianu ofrecido por