UVIÉU, 2 Abr. (EUROPA PRESS) -
El catedráticu d'Informática de la Universidá d'Uviéu Juan Manuel Cueva Lovelle aspira a renovar el Rectoráu de la institución académica en presentando la so candidatura a les elecciones vinientes del 25 d'abril, adelantaes pol rector actual y candidatu a la reelección Ignacio Villaverde.
Villaverde, que va formalizar esti miércoles la so candidatura, argumentó hai trés selmanes que la so decisión ta basada na aprobación de los estatutos nuevos, al entender que tienen que traer un claustru nuevu y la renovación del Conseyu de Gobiernu. El día 4 va ser la proclamación provisional de candidatures y la campaña va principiar el 11 d'abril.
Asina, Cueva Lovelle cree que la decisión del rector pilló "a contrapié" a la comunidá universitaria y supón "un insultu" a la esencia de la institución como "órganu de reflexón y debate".
Recuerda que la llei d'universidaes nueva fixa un mandatu únicu de 6 años, polo qu'entiende que va tener que tratar con tiempu y diálogu esi horizonte nuevu pa la institución. Llamenta que nun foi asina por pretender que namás hubiera un candidatu.
Esti catedráticu que trabaya dientro del área de Llinguaxes y Sistemes Informáticos, entiende que la Universidá d'Uviéu merez "alternatives" y destaca l'apoyu que se ta atropando en tolos campus.
"Too se pue anque lo pongan difícil", sostién, ironizando con que la sociedá "yá nun ye analóxica" y les tecnoloxíes nueves permiten xuntes a distancia y sortear que la Universidá tuviera zaerrada por vacaciones de Selmana Santa.
En declaraciones a Europa Press, Cueva Lovelle esplica que pretende dar un xiru a la política del equipu rectoral actual y comprométese a pactar cola comunidá universitaria les prioridaes de la institución pa los años vinientes, "dende un presupuestu realista, vinculáu a un plan estratéxicu nuevu", a un actualizáu allugamientu de la Universidá como motor de la economía asturiana pa contribuyir a impulsar la industria, el turismu de calidá y la cultura.
Atender les necesidaes de la plantiya frente a les decisiones del equipu de Villaverde que, diz, xeneraron "malestar grande" ente'l Personal d'Alministración y Servicios (PAS), correxir la "situación grave" de l'actividá investigadora y apostar por una verdadera participación" del estudiantáu, son otres prioridaes del programa que plantea.
Reconocíu en 2022 col premiu Impulsu TIC 'Mención especial' pol so impulsu a la disciplina informática y les tecnoloxíes de la información y comunicación, la so trayectoria inclúi la dirección de la Escuela Universitaria d'Inxeniería Técnica Informática d'Uviéu y el Departamentu d'Informática, amás de la coordinación del Máster Universitariu n'Inxeniería Web, la creación del programa de doctoráu n'Inxeniería Informática y la so collaboración na creación de los colexos profesionales d'Inxeniería Informática nel Principáu d'Asturies, CITIPA y COIIPA.
Andalucía
