UVIÉU, 12 Dic. (EUROPA PRESS) -
La Conseyería d'Educación va convocar en 2020 la mayor ufierta d'empléu públicu (OEP) pa Secundaria, con 712 places distribuyíes en 29 especialidaes. Amás, el tercer fíu va tener matricula de baldre na rede de 0 a 3, que va abrir cuatro escueles nueves en Balmonte, Degaña, Parres y Ponga.
Asina lo anunció la conseyera Carmen Suárez esti xueves na so comparecencia na Comisión de Facienda de la Xunta Xeneral pa presentar el proyectu de presupuestos del Principáu pa 2020 de la so Conseyería, qu'algama los 694,1 millones, un 5% más que les cuentes vixentes.
Una partida que va permitir convocar, según indicó la conseyera, convocar la mayor ufierta d'empléu públicu desque Asturies asumió les competencies en materia d'educación en 2000. Per otru llau, los presupuestos van dedicar 535 millones a gastos de personal --28,6 millones más qu'en 2016--.
Con ella, preténdese sufragar, en parte, los costos del amenorgamientu de la xornada lectiva a 18 hores pal profesoráu de Secundaria, amás del aumentu del presupuestu pa sustituciones y los sos costos sociales.
La OEP acuta 537 places pa ingresu llibre de los cuerpos de Secundaria y técnicos de Formación Profesional, amás de 175 places pa promoción interna, colo que la Conseyería va buscar asumir la tasa d'interinidá. Per otru llau, un 7% de les places va acutase pa persones con discapacidá.
A esto hai que sumar otros cinco de profesoráu d'Escueles Oficiales d'Idiomes y, pela primer vez dende l'asunción de les competencies, 250 de promoción interna de catedráticos de Secundaria. El costu de los procedimientos selectivos valórase en 1,5 millones.
Xunto eso, Educación va xubir un 5,2% la financiación de la etapa d'Infantil de 0 a 3 años, a la que se destinen 17,1 millones de creitu ampliable pa subvencionar los gastos de funcionamientu y de personal de los 69 centros d'esti tipu en 43 conceyos.
Esta medría va dexar, según la Conseyería, que les families numberoses qu'opten por matricular a los sos fíos nesta rede puedan facelo de forma gratuita, amás de l'apertura de cuatro escueles nueves en Balmonte, Degaña, Parres y Ponga, amás d'ampliar les de Cangues d'Onís, Xixón, Castropol y Valdés.
INFRAESTRUCTURES
Per otru llau, les inversiones n'infraestructures educatives xuben a más de 13 millones, de los que 2,1 van destinase a inversiones en centros d'Educación Infantil y Primaria y más de 10,8 a Secundaria.
Ente les primeres destaquen l'arreglu de les cubiertes de la escuela Infanta Leonor de Castrillón y los colexos de Llaranes, d'Arenas en Cabrales y Turiellos, de Llangréu; les reformes nel colexu Teodoro Cuesta; y l'arreglu de la pista deportiva del colexu La Vallina de Lluanco.
Tamién se van redactar los proyectos básicos del centru de Roces (Xixón), Educación Especial de Llatores (Uviéu) y la reubicación del Virxe de les Marees (Avilés). Amás, en Secundaria van acometese les obres de los institutos de La Fresnera y La Florida, y cuenten principiar les obres del institutu de La Corredoria y del nuevu aulariu del Rei Pelayo, en Cangues d'Onís.
P'acabar, la cuantía dedicada a Formación Profesional xube a 74,1 millones. Trátase d'una medría de 3,7 millones, lo que va buscar ampliar el modelu de FP Dual. Amás, va haber una partida de 1,4 millones pa fomentar la educación inclusiva y de 1,5 pa innovación y apoyu a l'acción educativa.
