WASHINGTON, 22 de Xunu (Reuters/EP)
El Gobiernu d'Estados Uníos ta pagando indirectamente decenes de millones de dólares a 'señores de la guerra afganos' y, posiblemente, a los talibán col fin de garantizar la seguridá de los convóis nos que se tresporten suministros pa les tropes norteamericanes esplegaes n'Afganistán, según un informe del Congresu estadounidense.
El sistema qu'utiliza'l Pentágonu de subcontratar a empreses de seguridá privaes pa que s'encarguen de tresportar de forma segura los suministros n'Afganistán permite a les tropes estaounidenses centrase na llucha contra la insurxencia. Pero les sos consecuencies imprevistes perxudiquen a los esfuerzos de Estados Uníos pa intentar que s'erradique la corrupción y haya un Gobiernu afganu eficaz, alvierte l'informe, que se va revisar esti martes nel Congresu.
John Tierney, presidente del subcomité sobre seguridá nacional de la Cámara de Representantes, esplicó nun comunicáu qu'esti sistema "estimuló un chantaxe desarrolláu por una escura rede de señores de la guerra, homes fuertes, comandantes, miembros corruptos de les autoridaes afganes y posiblemente otres persones".
Tierney, del Partíu Demócrata --son los representantes demócrates del subcomité los qu'ellaboraron l'informe--, señaló que'l citáu sistema "va en contra" de les mesmes normes del Departamentu de Defensa y que podría tar socavando los esfuerzos entamaos por Estaos Uníos p'aplicar la so estratexa n'Afganistán.
L'estudiu describe los pagos que se faen pa garantizar la protección de los convóis como "una importante posible fonte de financiación pa los talibán" y p'apoyar esta tesis cita numberosos documentos, incidentes qu'asocedieron y mensaxes de corréu electrónicu nos que se menten intentos d'estorsionar a los talibán nes rutes per onde se tresporten los suministros.
Los investigadores del Congresu empezaron a analizar en payares del 2009 el contratu del Pentágonu cola empresa Host Nation Trucking (HNT), valoráu en 2.160 millones de dólares. Esti contratu cubre'l 70 por cientu de la distribución de los alimentos, el combustible, la munición y otros suministros que reciben les tropes estadounidenses esplegaes n'Afganistán.
L'informe diz que HNT y otres empreses de tresporte per carretera subcontrataes nel país centroasiáticu "paguen decenes de millones de dólares cada añu a 'señores de la guerra' de too Afganistán en cuenta de protección pa los convóis de HNT que lleven suministros a les tropes estadounidenses". "Los contratistes de HNT suelen referise a esos pagos como 'estorsiones', 'sobornos', 'seguridá especial' y/o 'pagos por protección'", precisa.
Andalucía
