Actualizado 08/05/2009 23:54

Hevia propón a los partíos y colectivos qu'apoyen la oficialidá crear una plataforma política electoral unitaria

El músicu ye académicu d'honor dende l'actu de güei, nel qu'Ana Cano anunció la entrada en Google del fondu editorial de la institución

UVIÉU, 08 de Mayu (EUROPA PRESS)

El gaiteru José Ángel Hevia propunxo güei a los partíos políticos y colectivos qu'apoyen la oficialidá que s'unan nuna plataforma electoral unitaria p'algamar representación parlamentaria y lluchar por esti oxetivu. El músicu pidió tamién güei a les grandes formaciones, PSOE y PP, qu'acepten la oficialidá de la llingua asturiana como una forma de superar la crisis económica. Tamién solicitó a l'Academia de la Llingua'l cambiu de l'aceición de gaiteru que recueye'l Diccionariu d'esta institución (DALLA).

Hevia pronucióse nesti sen demientres l'actu de l'Academia de la Llingua Asturiana de conmemoración del Día Les Lletres, nel que quedó nomáu académicu d'honor, la primer vez qu'un músicu recibe esti títulu. Nel actu tuvieron representantes de los principales partíos políticos asturianos. Ente ellos taben Javier Fernández y Adriana Lastra del PSOE, Carlos Galcerán y Emilio Pérez Cueva del PP, y Francisco Javier García Valledor y Noemí Martín, ente otros, d'Izquierda Xunida-Bloque por Asturies-Verdes.

Nel so discursu entrugóse "qué pasaría si organizaciones y partíos políticos, penriba de les sos diferencies ideolóxiques, s'unieren nuna plataforma electoral que llevare nel so primer puntu del programa electoral la oficialidá". Encamentó poro que s'unan nesti sen, y foi especialmente críticu colos partíos "minoritarios", a los que reprochó que "seyan pocos y anden engarraos ente ellos". Pidió-yos a estos tamién que s'unan porque "si nun son capaces a unise pa lluchar pola oficialidá, tán dando a entender que cola desunión la oficialidá nun ye una prioridá pa ellos".

Enantes de la so intervención, en declaraciones a Europa Press, Hevia dixo que quería convidar a los presentes a "ser conscientes de la necesidá d'oficialidá". Quiso tamién treslladar al PSOE y al PP el convencimientu de que "ye una contribución a salir de la crisis y no tolo contrario, como s'intenta facer ver".

Pero otra parte , dio un "tirón d'oreyes" a la Institución, pa que se cambie la entrada de gaiteru nel diccionariu de l'Academia de la LLingua. La mesma tien delles aceiciones: una ye la persona que toca la gaita, la otra fai mención a una persona a la que-y presta la folixa, y otra fala de dalguién poco serio. "Per un llau nun ye lo mesmo tocar la gaita que ser gaiteru, que ye tener l'oficiu de tocar la gaita", afirmó. "Per otru, ye un anacronismu güei yá dicir que gaiteru significa persona poco seria o folixera, porque ye una profesión seria", protestó.

Mostróse tamién sorprendíu del so nomamientu porque "yo como músicu nun uso l'asturianu, dao que soi músicu instrumental". "Uso la llingua na vida pública, pero nun soi un poeta n'asturianu. Acepté'l cargu pero sorprendióme, y por supuesto si pueo aportar dalgo a nivel d'imaxe pública pola Academia pues ellí voi tar", señaló.

GOOGLE BOOKS

Pela so parte, la presidenta de l'Academia, Ana Cano, nel so discursu oficial, dio anuncia de que l'Alla "vien de roblar (el pasáu 7 d'abril) un pautu con Google pal inxerimientu de tol fondu editorial de la institución nesi escaparate o llibrería virtual que ye Google Books". "Hai que tener presente", añadió, "que la gueta de llibros de Google ye ún de los preseos de marketing online con más puxu a nivel mundial y una de les ferramientes más efeutives en cuantes a lo so aplicación".

"Quier dicise que cualquier persona, en nun importa qué país del mundu, podrá consultar o güeyar cualquier publicación de l'Academia, lo mesmo que si tuviere'l llibru nes manes nuna llibrería; y si'l conteníu ye del so interés podrá mercalu llueu, per aciu de los enllaces y direiciones afayadices que se conseñen na mesma páxina de consulta del llibru", esplicó.

MINOR INSUFICIENTE

Aprovechó tamién pa calcar en que'l Minor de Llingua Asturiana aprobáu pola Facultá de Filoloxía ye "insuficiente dafechu", al sumar 48 creitos, y nun ye poro la "solución más afayadiza", pese a valorala pol so significáu. "Asina, mientres la llingua asturiana s'encartiya, exactamente igual que les otres llingües (inglés o francés) nel títulu de Maestru d'Enseñanza Primaria, per entemedies d'una 'Mención en Llingua Asturiana', o nel 'Máster de Formación del Profesoráu d'Educación Secundaria', la propuesta de la Facultá de Filoloxía, con un Minor en llingua asturiana (48 creitos), queda mui perbaxo, cuantitativa y cualitativamente, de toles otres llingües: del inglés, del francés, del italianu, del portugués o del alemán".

"Sicasí, magar ello, nun pueo dexar de sorrayar la importancia que tien el fechu de que la llingua asturiana s'inxerte de manera reglada nel contestu universitariu", señaló.

Nel so discursu, Cano tuvo especiales pallabres de reconocencia pa Hevia, tanto pola so trayeutoria musical como pol so usu habitual de la llingua asturiana. Tamién fizo alcordanza de la escritora Nené Losada, o d'Emilio Barrioso, especialista en léxicu marineru, dambos desapaecíos el pasáu añu.

Fizo tamién un respasu al llabor d'Academia nos últimos 30 años, y especialmente al del últimu exerciciu, nel que se publicó, ente otres coses, el númberu 100 de la revista Lletres Asturianes, y se celebró'l I Conceyu Internacional de Llingua Asturiana.

L'Actu, celebráu ante numberosu públicu nel Teatru Campoamor, entamó con una actuación del gaiteru Yago Bugallo y acabó cola d'otru gaiteru, Xuacu Amieva. Tamién incluyó una esbilla de poemes.

Asturianu ofrecido por