Actualizado 07/02/2008 19:43:08 +00:00 CET

Muerre un trabayador nun accidente llaboral na papelera d'ENCE en Navia (Asturies)

UVIÉU, 07 de Febreru (EUROPA PRESS)

José Manuel Valle, de 32 años y vecín de la población de Trelles, nel conceyu asturianu de Cuaña, morrió güei nun accidente llaboral ocurríu na fábrica de producción celulosa que la Empresa Nacional de Celuloses (ENCE) tien na población asturiana de Navia. Según explicó'l presidente del Comité d'Empresa, Eduardo Díaz, el xoven perdió la vida tres cayer, por causes desconocíes, a la caldera de biomasa na que se xenera la electricidá de la empresa.

El siniestru sucedió hacia les 8.00 hores. Nesi momentu, compañeros del muertu "echáronlu en falta" y dieron la voz d'alarma. Minutos dempués, según esplicó'l voceru de la plantiya d'ENCE-Navia a los medios de comunicación, "detectóse un fuerte olor y vimos que na caldera había dalgo estrañu". Tres parar el so funcionamientu, comprobaron que nel so interior había restos que "paecíen humanos" calcinaos dafechu.

Darréu diose avisu a la Guardia Civil que foi a la fábrica en compañía d'un forense. El facultativu determinó qu'esos restos correspondíen a un home. Tres realizar los pertinentes análisis, determinóse que la identidá correspondía cola del xoven operariu muertu.

Tanto la empresa como la propia Policía Xudicial abrió una investigación pa esclariar el siniestru. Eduardo Díaz dixo desconocer lo "asocedío" al alcontrase'l so compañeru "solu nel momentu del sucesu".

Sicasí, esplicó que "una de les hipótesis que se baraxen ye que pudiera ser succionáu pola cinta tresportadora" qu'alimenta colos residuos forestales a la caldera de biomasa. "Lo qu'hai que determinar ye en qué fase d'esti sistema ocurrió l'accidente", añadió'l presidente del Comité d'Empresa. Sin embargu, considera'l siniestru como "dalgo mui estrañu ya qu'esi sistema de calderes son mui segures. De toes maneres, hai que saber qué falló". Fontes de la compañía informaron de que nun se detectó funcionamientu irregular na maquinaria.

Eduardo Díaz esplicó que José Manuel Valle llevaba trabayando n'ENCE-Navia dende hai cinco años y describiólu como un trabayador "mui responsable".

La muerte d'esti mozu ye la primera que se rexistra na plantiya de la fábrica de celuloses de Navia dende la so construcción, en 1973.