UVIÉU, 24 May. (EUROPA) -
La oficialidá del asturianu va suponer que l'asignatura de 'Llingua asturiana y Lliteratura' --o gallego-asturianu nel casu de la zona del Navia-Eo--, va pasar a ser una asignatura más cursada pola xeneralidá del alumnáu. Un procesu que va realizase de forma gradual y pal que se van permitise escepciones que van quedar recoyíes na normativa autonómica.
Asina se recueye nel informe 'La llingua asturiana nuna perspectiva d'oficialidá', que'l presidente de l'Academia de la Llingua Asturiana, Xosé Antón González Riaño, apurrió a los grupos parllamentarios esti xueves na xunta en Presidencia y que los partíos d'esquierdes asumieron como base pa desenvolver la 'oficialidá a l'asturiana' o 'oficialidá amable' defendida pol presidente Adrián Barbón.
El documentu recueye que los cambios na escolarización cola aprobación de la oficialidá van constituyir "un procesu bien cenciellu" pola práctica previa que vien desenvolviéndose dende 1984, cuando l'asignatura de 'Llingua Asturiana y Lliteratura' entró nel sistema educativu. Asina, indícase que la oficialidá de la llingua malapenes representaría "cambios mínimos" na etapa universitaria y n'Educación Infantil.
Asina, na escolarización de 0 a 6, la oficialidá "nun va suponer nengún cambiu estructural fondu" al nun facer falta crear un área específica porque "valdría con adaptar la vixente de 'Comunicación y Representación de la Realidá'.
Nesti área habría qu'afitar conteníos rellacionaos cola realidá llingüística y cultural asturiana onde s'incluyiríen cuentos, lleendes, cantares, cosadielles o fórmules llingüístiques cencielles. Amás, yá hai materiales curriculares pa l'aplicación d'estos conteníos.
No relativo a la implementación de la oficialidá nes etapes educatives d'Educación Primaria, Secundaria, Bachilleratu, Formación Profesional y na Educación Permanente d'Adultos, el procesu va plantease per fases y va tar apoyáu na esperiencia previa de la escolarización del asturianu y del gallego-asturianu.
Asina, el currículu d'Asturies d'eses etapes educatives va tener qu'adaptase "mínimamente" a la situación d'oficialidá pa ufiertar una materia como asignatura normal cursada pola xeneralidá del alumnáu y con un horariu mínimu qu'asegure'l so dominiu pol alumnáu. Esti va poder establecese, por exemplu, en trés sesiones selmanales.
El costu de la enseñanza del asturianu, que recibiría una partida específica de l'alministración del Estáu cada añu, sería d'unos 18 millones d'euros derivaos de la so xeneralización nos niveles non universitarios. Per otru llau, la oficialidá va suponer la creación inmediata de la especialidá docente de 'Llingua Asturiana y Lliteratura', lo que va permitir la estabilización d'alredor de 300 profesionales.
Andalucía
