UVIÉU, 17 Oct. (EUROPA PRESS) -
El Gobiernu asturianu tien la intención de que los presupuestos del 2018 incluyan una partida de 165.000 euros pa dotar de fondos a la rede de biblioteques públiques. Una cantidá que supón una medría de más del 50% sobre los 100.000 destinaos anguaño.
Asina lo anunció'l conseyeru d'Educación y Cultura, Genaro Alonso, esti martes na Comisión d'Educación y Cultura de la Xunta Xeneral, onde-y preguntó pol tema'l diputáu popular Pedro de Rueda Gallardo.
Según el conseyeru, la intención del Executivu autonómicu ye destinar 100.000 euros pa dotar de fondos bibliográficos a la Biblioteca d'Asturies, n'Uviéu, y a la Biblioteca Xovellanos, de Xixón, que son de titularidá estatal pero de xestión autonómica. Amás, incorpórase una cantidá de 65.000 euros pa l'alquisición de llibros destinaos a la rede de biblioteques municipales.
Alonso afirmó que ye una cantidá que sigue siendo "insuficiente", pero que supón una medría y muestra "un enclín a l'alza". Asina, apuntó que la partida que pretenden incluir nel proyectu de presupuestos autonómicos del 2018 supón una medría de más del 50%.
Amás, calificó a les biblioteques como "centros neurálxicos de primer orde" y señaló que cuando visita un centru educativu "lo primeru que visito ye la biblioteca" y recordó que les biblioteques de los centros educativos "súrtense con fondos públicos".