Actualizado 03/06/2008 21:27 CET

Productores llecheros exixen un preciu "xustu" n'orixe y un preciu "correctu" pa los consumidores

MADRID/UVIÉU, 03 de Xunetu (EUROPA PRESS)

El direutor xeneral de la Federación Española d'Empresarios Productores de Lleche (Prolec.) Carlos Gil, reclamó güei l'establecimientu d'un preciu "xustu" n'orixe, que como mínimu seya de 0,43 euros por llitru, al tiempu que consideró oportunu que'l consumidor pague pola lleche un preciu "correctu".

Al so xuiciu, dichu preciu, superior en tres céntimos al recibíu nesti momentu polos productores, nun sólo tien de cubrir los costes de producción de la lleche, que subieron un 17% na última campaña, sinón permitir un marxe "llóxico" pa tola cadena, ye dicir, pa los productores, la industria y la distribución.

"El preciu mínimu tien de ser polo menos de 0,43 euros por llitru", afirmó Gil, quien, sicasí, señaló qu'ésti tien de variar en función de la evolución de los precios del gasoleu pa torgar la perda "constante" d'esplotaciones ganaderes, que s'eleven a 25.000 al final de la campaña 2007-2008, un 15% menos que na anterior, lo que supón la desapaición de 11,4 esplotaciones diaries.

Según los datos de Prolec. los precios al productor baxaron un 11,4% dende'l pasáu mes de xineru, mientres que'l marxe de la industria y la distrubión incrementóse un 50,9% teniendo en cuenta los datos del mes de marzu. "El ganaderu ye la gallina de los güevos d'oru pa les industries", dixo Gil, quien reclamó un marxe "dignu" tamién pa los productores.

Nesti momentu, comprar un llitru de lleche cuésta-y al consumidor ente 0,68 y 1,05 euros por litru (0,82 por llitru de media), mientres que'l productor recibe ente 0,39 y 0,43 euros por llitru (0,40 euros por llitru de media).

El direutor xeneral de Prolec reconoció que'l sector atraviesa una crisis ante la inseguridá sobre los precios, un problema común en tolos países europeos y pola mor de la falta d'una política sectorial "coherente" y l'incrementu de "lleche negra" que supón el 25% de la cuota llechera d'España, que ta en 6,1 millones de tonelaes añales.