UVIÉU, 11 Ago. (EUROPA PRESS) -
El Serviciu de Vixilancia Epidemiolóxica de la Conseyería de Salú del Gobiernu d'Asturies notificó esti martes al Ministeriu de Sanidad once casos positivos nuevos de coronavirus, seis d'ellos rellacionaos colos brotos declaraos en Cangas y nun chigre de Xixón.
El focu detectáu n'El Chiriguito del Pela en Courias, incorpora dos contaxos nuevos nel últimes 24 hores, polo que'l númberu total de persones afectaes xube a 15. Coles mesmes, otros cuatro infectaos tán vinculaos al brotu declaráu nel chigre La Buena Vida de Xixón, que suma hasta agora 32 contaxos.
A estos seis positivos súmase otru procedente d'Andalucía y ún más que ye contactu estrechu d'un casu detectáu enantes. Amás, detectáronse trés contaxos que tán n'estudiu pa determinar el so vínculu epidemiolóxicu. Toles persones infectaes presenten síntomes leves y tán n'aislamientu nes sos cases.
Per otru llau, el Serviciu de Salú del Principáu (Sespa) decidió retirar el puntu d'autocovid de Llanes, instaláu depués del llamamientu pal estudiu ampliáu del brotu nel conceyu, porque la solicitú de pruebes amenorgó considerablemente.
D'equí p'alantre, va citase a les persones que precisen una PCR, una vez rellenáu'l correspondiente formulariu, pa practica-yos el test.
