UVIÉU, 13 May. (EUROPA PRESS) -
El rector de la Universidá d'Uviéu, Ignacio Villaverde, presentó esti llunes al so equipu rectoral nuevu, col qu'encara'l mandatu nuevu --y últimu d'alcuerdu a la llei d'Universidaes nueva-- por seis años. Incorporando seis cares nueves, Villaverde entamó la estructura de la institución académica en nueve vicerrectoraos y trés delegaciones del rector.
En rueda de prensa, el rector esplicó que nesti mandatu qu'agora empieza, en ganando les elecciones al rectoráu'l 25 d'abril, va haber un apueste "claru" pola internacionalización y el modelu nuevu de docencia na Universidá.
Asina, creáronse dos delegaciones nueves del rector pal posicionamientu internacional de la Universidá, una d'elles pal Real Colexu Complutense en Harvard y EEUU, y otra pa les grandes aliances internacionales como la europea 'Ingenium'. La primera ta liderada pola doctora en filoloxía inglesa Cristina Valdés, y la segunda pol catedráticu de física aplicada Jesús Daniel Santos. Villaverde indicó que l'apueste por esti tipu d'aliances estratéxiques precisen persones que se dediquen "namás" a ello.
La tercer delegación del rector, liderada pol profesor de métodos d'investigación y diagnósticu n'educación Marce Fernández-Raigoso, ta rellacionada cola Coordinación y Rellaciones Institucionales.
Sobre los nueve vicerrectoraos, creáronse dos nuevos y fixéronse reordenaciones al traviés de les que se sumen responsabilidaes a los distintos departamentos. Los de creación nueva son el Vicerrectoráu d'estudios y docencia, lideráu pol doctor en química Juan Manuel Marchante, y el Vicerrectoráu de planificación estratéxica y coordinación de campus, dirixíu por Juan Carlos San Pedro.
Los siete vicerrectoraos restantes son el de Polítiques del profesoráu y ordenación académica --col doctor en ciencies matemátiques Pedro Alonso al frente--; el d'Investigación --cola catedrática de ciencia de la computación y IA Irene Díaz--; el d'Estensión y proyección cultural --cola catedrática d'historia del arte María Pilar García Cuetos; el d'Estudiantes y empléu --col doctor en medicina Alfonso López--; el de Tresferencia y rellaciones cola empresa --cola catedrática d'inxeniería química Susana Luque--; el de Sostenibilidá y dixitalización --cola doctora y inxeniera industrial Inés Peñuelas--; y el d'Internacionalización, --cola profesora del área de comercialización y investigación de mercáu Ana Suárez al frente--.
Estrénase nes sos responsabilidaes como vicerrectores Susana Luque, Ana Suárez, Juan Carlos San Pedro y Juan Manuel Marchante. Sobre los miembtos anteriores del equipu que nun siguen nes sos responsabilidaes, Villaverde espresó la so "gratitú" polos años de "trabayu intensu, compromisu y dedicación" que mostraron nos trés años de gobiernu.
Trátase, esplicó, d'un equipu que va encarar un proyectu nuevu de continuidá "pero non continuista" del que se cayeron delles persones nes que'l rector perdió la confianza. "No humano foi duru'l cambiu", aseguró, destacando que primó la visión de "xestor" pa llograr "l'equipu meyor" pa la etapa nueva, na qu'espera que la institución académica encare una reflexón sobre'l so desempeñu como institución docente.
Andalucía
