UVIÉU, 4 May. (EUROPA PRESS) -
La Xunta pola Defensa de la Llingua Asturiana afirmó que la oficialidá supón "ampliar derechos" y qu'esto representa'l "futuru". Asina, indicaron que les declaraciones en contra de la oficialidá vienen de "dinosaurios" que salen "de les llurigues" p'avisar del "apocalipsis" al vese "sobrepasaos" por una "marea de normalidá democrática".
Asina lo señalaron nel discursu final de la manifestación pola oficialidá d'esti Día de les Lletres Asturianes, lleíu delante del Teatru Campoamor. Nesi sentíu, l'asociación recordó que yá lleven 32 años manifestándose'l primer vienres de mayu "por desgracia pa la salú democrática d'Asturies".
Pa la XDLA, la oficialidá tien que ser "nesta llexislatura" porque "ye inaceptable" tar un día más asina "siendo sabedores de la inxusticia y habiendo una mayoría posible pa pone-y remediu". Por eso, esplicaron que con 12 diputaos pue presentase na Xunta Xeneral una propuesta pa reformar l'artículu 4 del Estatutu.
"Queremos saber si existen 27 diputaos a favor de la oficialidá", indiquen en referencia a la mayoría necesaria p'aprobar una reforma del Estatutu, p'añadir que'l debate de la oficialidá ye "si o nón" y que "nun hai términos medios". Amás, espliquen que lo qu'habría que facer na llexislatura próxima ye una Llei de Normalización "que desenvuelva col mayor consensu posible como va ser na práctica".
Tamién tuvo palabres la XDLA pa criticar al presidente de la Xunta Xeneral, Pedro Sanjurjo, al qu'acusen de romper el so papel institucional por posicionase en contra d'una postura que mesmo "defende'l so partíu".
Sanjurjo, nel actu institucional de la Selmana de les Lletres esti miércoles, posicionóse a favor de mantener el marcu llingüísticu actual y afirmó que'l debate sobre la oficialidá taba más basáu "en sentimientos qu'en razones".
Por eso, la XDLA pregúntase si "la tolerancia, la solidaridá o'l respetu a los derechos de los ciudadanos son sentimientu o razón" y si "esti ye'l nivel políticu de los líderes que nos tuvieron negando una reivindicación que llevamos décades reclamando".
Asina, afirmen qu'esto muestra que los sectores contrarios a la oficialidá "vense sobrepasaos por esta marea de normalidá democrática". "Ampliar derechos ye'l futuru, negalos ye'l pasáu", indica la Xunta, qu'añade que "los dinasaurios salen de les llurigues pa facer declaraciones, p'avisar del apocalispsis si se dan derechos ciudadanos".
Contra esto, l'asociación fai apueste por abrir "espacios a la llibertá, los derechos y a la democracia" y por "pasar páxina" a la "falta de derechos y de reconocimientu" pa pasar "a llabor de salvar el nuestru patrimoniu llingüísticu pa les xeneraciones futures".
