UVIÉU, 23 May. (EUROPA PRESS) -
La Xunta pola Defensa de la Llingua Asturiana (XDLA) llamó a participar "masivamente" esti domingu nes elecciones autonómiques "pa derrotar los partíos políticos que, con posiciones antidemocrátiques, muestren día a día l'odiu hacia la llingua asturiana".
Al traviés de nota de prensa, la organización afirma que nestes elecciones va contraponese un modelu social basáu na tolerancia y nos derechos y otru "restrictivu" que, según la XDLA, "ye'l mesmu que negó'l votu a les muyeres, el divorciu, l'albuertu, el matrimoniu ente persones del mesmu sexu o'l feminismu".
Nesi sentíu, recuerden que la Constitución establez nel so artículu 3 que, xunto al castellanu, les demás llingües españoles van ser oficiales nes sos comunidaes autónomes, polo que tar en contra d'esti marcu llegal "supón tar en contra de l'aplicación de la Constitución española n'Asturies".
La organización recuerda que la oficialidá aplicóse con éxitu n'otros territorios col votu a favor de los partíos qu'equí la nieguen, polo que pregunten si los asturianos "somos ciudadanos de segunda o que la nuestra llingua ye de segunda".
Per otru llau, critiquen a los qu'afirmen que tán en contra de la oficialidá, pero a favor del asturianu porque "nun se pue tar a favor d'una llingua y al mesmu tiempu nega-y los derechos que tienen les demás".
Sobre'l gastu que supondría como sida contra la oficialidá, la XDLA pregúntase si nun tener esti marcu llegal supunxo dalgo bono pa la economía asturiana y si Asturies ta meyor que Galicia nestos momentos.
"¿Hai más trabayu equí porque l'asturianu nun ye oficial? ¿Hai menos emigración de la mocedá porque'l nuestru idioma nun tien les mesmes condiciones que'l castellanu? ¿Lleguen enantes les infraestructures y salen más aviones del aeropuertu porque se pierda l'asturianu?", ironiza la organización.
"Esti domingu hai qu'enllenar les urnes de votos a favor d'una Asturies más xusta y más democrática, que mire hacia'l futuru pero ensin escaecer el so pasáu. Ta nes manes de toles asturianes y asturianos", sentencien.
