Bizkaiko Aldundiak 910.000 euro banatuko ditu berdintasun arloko proiektuak egiteko

BILBO, 23 (EUROPA PRESS)

Bizkaiko Foru Aldundiko Enplegua, Gizarte Kohesioa eta Berdintasuna Sustatzeko Sailak 910.000 euro bideratuko ditu emakumeen eta gizonen berdintasunaren inguruko proiektuak egiteko 2024ko ekitaldiko aurrekontuaren kargura, foru erakundeko gobernu kontseiluak horretarako ematen diren diru laguntzen deialdia eta oinarri arautzaileak onesten dituen foru dekretua onartu ondoren.

Foru erakundeko ordezkariek azaldu dutenez, testuak diru laguntzen lau modalitate arautzen ditu: emakumeen elkarteak indartzeko diru laguntzak (80.000 euro); emakumeen elkarteentzako diru laguntzak, emakumeen eta gizonen berdintasuna sustatzeko proiektuak egiteko (252.000 euro); irabazi asmorik gabeko erakundeentzako diru laguntzak, emakumeen eta gizonen berdintasuna sustatzeko proiektuak egiteko (378.000 euro); emakumeen eta gizonen berdintasuna sustatzea helburutzat duten proiektu eraldatzaileetarako diru laguntzak (200.000 euro).

Diru laguntza eskuratu ahal izateko, erakunde eskatzaileak foru dekretuaren 21., 28., 35. edota 42. artikuluetan ezarritako baldintzak bete beharko ditu, aurkezten den diru laguntza modalitatearen arabera.

Enplegua, Gizarte Kohesioa eta Berdintasuna Sustatzeko foru diputatuaren agindu baten bitartez emango dira diru laguntzak, lehia konkurrentziaren araubidearen arabera, hau da, kasuan-kasuan dagokion artikuluetan ezartzen diren irizpideen arabera baloraziorik altuena lortzen duten eskabideei emango zaie diru laguntza, baina kontuan hartuta kasu bakoitzean aurrekontu sailean izendatutako zenbatekoa dela muga.

Ezarritako prozeduraren arabera diru laguntzak onetsita, eta prozeduraren ebazpena jakinarazten denetik gutxienez hamar eguneko epea igarota, emandako diru laguntzaren zenbatekoaren %100 izapidetuko da.

Diru laguntza jaso nahi duten erakundeek dagokien eskabidea aurkeztu beharko dute, egoitza elektronikoan nahitaez, Administrazio Publikoen Administrazio Prozedura Erkidearen 2015eko urriaren 1eko 39/2015 Legearen 14.2.a artikuluak ezarritakoaren arabera (https://www.ebizkaia.eus/eu/hasiera). Eskaerak egiteko epea hilabetekoa izango da foru dekretua Bizkaiko Aldizkari Ofizialean argitaratu eta biharamunetik zenbatzen hasita.

HELBURU ESTRATEGIKOA

Enplegua, Gizarte Kohesioa eta Berdintasuna Sustatzeko Saileko Berdintasuna Sustatzeko Zuzendaritza Nagusiak bere helburuen estrategikoen artean dauka emakumeen eta gizonen berdintasuna sustatzea.

Gobernamendu onerako neurriekin batera, hiru esku hartze ardatzek egituratzen dute Bizkaiko Emakumeen eta Gizonen Berdintasunerako VI. Foru Plana (2021-2024): indarkeria matxistarik gabeko bizitzen alde lan egitea, ahalduntze feminista eta berdintasuna garapen iraunkorrean.

Ildo horretan, irabazi asmorik gabeko emakume elkarteen eta erakunde mistoen lanak funtsezko protagonismoa hartzen du berdintasuneranzko aldaketa sozialean. Horretarako, beste tresna batzuez gain, Berdintasuna Sustatzeko Zuzendaritzak diru laguntza lerro batzuk ditu, haien bitartez emakumeen ahalduntzea, desberdintasunak ikusaraztea, rolak eta estereotipoak gainditzea eta abar bultzatzeko.