BILBO, 1 Oct. (EUROPA PRESS) -
Txalo Produkzioak taldearen 'Sagastitarrak' familiarteko komedia izango da ikusgai Bilboko Arriaga Antzokian igandean, urriaren 2an. Begoña Bilbao Lejarzegik zuzendu du muntaia, eta Joseba Apaolaza, Ainhoa Etxebarria eta Koldo Olabarri igoko dira taulara Ramon Madaularen 'Els brugarol' katalanezko jatorriko lanaren moldaketa antzezteko.
Martin Agirre arduratu da antzezlana euskaratzeaz eta euskal errealitatera hurbiltzeaz, bai izenei, bai abizenei dagokienez. Izan ere, abizena da sagastitarren familian liskarra sortuko duena, eta "umore garratz eta adimentsuagatik deigarria den antzezlanaren argumentuaren ardatz bihurtuko da", Arriagatik jakinarazi dutenez.
Bada, sagastitarrak goi burgesiako familia dira, eta alabarekin ez da giro bertan. Ane ekintzaile feministak bere lehen abizena aldatzea erabaki eta bere amarenaren alde egin du: "Patriarkatuarekin ez dugu amaituko, mundura ekarri gaituen amaren abizena hartzen ez dugun bitartean".
Anton Sagasti familiako buruarentzat ulertezina da eskualdean tradizio handikoa den Sagasti abizena aldatu nahi izatea, eta abizenari segida emateko, Antonek amarru eta martingala guztiak erabiliko ditu Ane alabak abizena aldatzeko asmoan atzera egin dezan.
Emanaldia 19:00etan hasiko da, eta sarrerak salgai daude, 18 euroan, www.teatroarriaga.eus webgunean edo antzokiko txarteldegietan, aurretiazko salmenta ordutegian.
